Dr.Lalzarmawii[/caption]
Christian Hospital Serkawn, Senior Medical Officer Dr. Lalzarmawii chu Cancer natna avangin February 8, 2020 zan dar 10:00 khan Ebenezer Hospital, Aizawlah a boral a. A ruang hi Serkawn-a an chenna Quarters-ah phurh haw niin, February 9, chhun dar 12:00-ah vui a ni a, Vui Inkhawm hi Rev. V. Laltlanzuala, Bialtu Pastor- Serkawn Bial-in kaihruaiin, thuchah a sawi bawk. Thlahna Inkhawm-ah hian Chhungkaw aiawh bakah BCM aiawhin Rev. Dr. C. Vanlaldika, AGS-in thu a sawi bawk. A fanu upa ber Delhi atanga lo haw chu nghah a a ni a, tlai dar 6:00 ah Serkawn thlanmualah ropui taka thlah liam a ni.
Dr. Lalzarmawii hi Pu C. Ramhluna leh Pi Laldinpuii fa niin, kum 1974, August ni 1 khan Shillong-ah a piang a. Lehkha thiam thei tak niin kum 1998 khan Gauhati Medical College, Guwahati ah MBBS a zo a. Internship te a zawh hnu-ah July 1, 200-ah Christian Hospital Serkawnah Medical Officer hna a zawm a, kum 2010 khan Ultrasound training-in examnaah pawh tha takin a pass a, a thih thlengin Ultrasound Doctor (Sonologist) hna hi a thawk a ni.
[caption id="attachment_15753" align="alignright" width="300"]
A pasal leh a fate[/caption]
A pasal Benjamin Lalhmingliana Hnialum (S/o Rev H Killuaia Chanmari, Lunglei) nen hian January 31, 1998 ah an innei-a, fanu 3 leh fapa pakhat - Rochansangi (21 yrs); Roneihpuii (19 Yrs), Rohluzuali (16 yrs) leh Timothy Roluahpuia (10 Yrs) te an nei a ni.
Mi challang leh hnuaihnung ber te, mi rethei leh hausa te ang khat veka en thintu, mi khawngaihna ngah tak, Pi Zari hi Mizo hmeichhe hleitling tak a ni a, a pumraw len ang bawkin mi rilru lian leh zau, mi pawi sawi ngai lo a ni. Amah hrechiangtu, a thawhpui Doctor te, Nurse te technician te leh Nurse student te’n an ngaina em em vek a ni.
Kum 2016 atangin hmeichhe thatlohna (tai na leh thi neih mumal loh) a insawisel tan a. Kum 2017 May thla ah chhul cancer tih hmuhchhuah a ni. CMC Vellore ah radiation pek a ni a, engemaw chen tha takin a dam a, Kum 2018 ah phei chuan in check up-a tum hnih Vellore-a a kal tih loh chu duty kumtluanin a thulh lo a ni.
Kum 2019 June thla atangin a na a rawn chhuak leh a, Vellore-ah te, Aizawlah leh Serkawnah te treatment lain Chemo khai a ni a, Chemo course a zawh hnu hian hnute bawk nei lehin cancer a ni tih hriat belh a ni leh a, a hnute bawk hi paihin chemo pek chhunzawm leh a ni. Chemo hi cycle 4 la tur a ni a, cycle 4-na, a course hnuhnung ber pek hnu hian a lo chau zual chho ta a, City Hospital Aizawl ah leh Ebenezer Hospital Aizawlah te ICU ah hun reilote enkawl a nih hnuin tun dinhmun hi kan lo thleng ta a, February 8, 2020 (Inrinni) zan dar 10:00 ah a rawng a lo bawl thin, Lalpa hnenah a chawl ta a ni.
Pi Zari thih thu hian BCM pumpui a nghawr chhuak a. A rawngbawlna leh inpekna te hi BCM chuan a ngaihluin a chhuang em em a, hun lo taka min kalsan ta mai hi kan uiin a sun takzet a ni. A kalsan, a pasal leh a fate Lalpa’n hruaiin awmpui zel se tih hi kan tawngtaina a ni.
Dr. Zari ruang lo thlen laiin Christian Hospital-a thawktuten zah takin an lo dawngsawng
