March 31, 2016 (Ningani) chawhnu dar 2:00 khan Christian Hospital Serkawn a Dialysis Unit chu a mamawhte hman theih turin Rev Lalthangliana Hnamte, BCM President-in Pathian hnenah hlânin a hawng ta. Hawnna Inkhawm hi Rev. Lalbiaksanga Chinzah, AGS i/c Service-in kaihruaiin, Upa Dr.B.Laldinliana, Med.Superintendent-in Technical Report a pe bawk. Tunah hian Dialysis khawl hi pahnih lei nghâl a ni a, hemi leina atan hian kohhran thawhlawm atangin Rs Nuai 34 vêl hmuh a ni. Vawi khat hman man hi Mizoram a tlâwm ber ni tûrin Rs 1500+consumables ruahman a ni. Assembly chuan khawl dang pakhat leina tûr kohhran tinin Pathianni zing vawikhat thawhlawm thawh leh nise tiin a rel a, hei hi June thla ral hmaa Headquarters-a thawn hman tûra beisei a ni. (Tûna Dialysis khâwl pahnih hi natna inkaichhâwn theih pai lo tân chauha hman tûr a ni a, natna inkaichhâwn theih veite tâna hman tûr khawl dang lei leh thuai a pawimawh hle a ni. Hemi atân hian Kohhran mipuite pawh lo inkauvin mahni Tualchhung Kohhran theuhah tan la tûrin kan in chah nghal a ni e)

..............

DIALYSIS CHUNGCHANGA HRIATTUR PAWIMAWH

Dialysis machine chungchang:

Dialysis machine hi Kal (kidney) chhan hrang hrang avanga chhia/thalote tana hman tur khawl pawimawh tak a ni a. Kal that lohna chhan hi kawng hrang hrangin a awm thei a. Chi khat Acute renal failure hi natna tam takin a awm tir thei a e.g. Malaria, kawthalo leh luak, thisen hloh hnem (bleeding), septicemia etc. Heng ho ah hian kal that loh dan kha temporary deuh a ni thei a, dialysis awm lohna hmunah chuan tam takin an thihpui tawh a, dialysis hmangin tha takin an dam leh thei a ni. Chi dang Chronic renal failure-ah erawh chuan Zunthlum leh kal natna then khat avangin kal a chhe thei a, hengah hi chuan a tlangpuiin kal thlak a ngai thin a, kal thlak theihloh chuan dialysis tih reng a ngai tawh thin a ni. Chuvangin, Dialysis machine hi nunna chhanna (life saving machine) khawl pawimawh tak a ni. Aizawlah chuan hospital tam takah he khawl hi an nei a, Chhim lam pangah erawh chuan Civil Hospital Lungleiah chauh a awm a. Chuvangin BCM –in he khawl kan nei thei tur hi BCM tan mai ni lo, chhim lam pang zawng zawng tan thil lawmawm leh malsawmna ropui tak a ni ang. Tuna kandinhmun:

Dialysis machine leina tur chu kohhran ten thahnemngai takin kan tuak zel a, tunah chuan khawl 2 leiin, kan khawl neihte Pathian hnena hlanna 31st March 2016 2:00 PM ah neiin, Rev. Lalthangliana Hnamte, President BCM in Pathian hnena hlanna leh hawnna a nei a. BCM chuan Lal Isua Krista tihdam rawngbawlna chhunzawmna kawngah rahbi thar a rap leh dawn ta. Kohhran, pawl, mimal, chhungkua etc anga kan thahnemngaihna Pathianin mal a sawm a, a lawmawm em em a ni.

Hma bak: Dialysis khawl pakhat dang lei belhna turin Kohhran zawng zawng ten Pathianni zing thawhlawm vawi 1 thawhkhawm turin BCM Assembly chuan a rel a, hei hi a tulna chhan: Tunah hian Dialysis service tanna tura khawlmamawh tlem thei ang berin bul kan tan dawn a. Dialysis service mamawhte tana tha zawka function thei tur chuan thisen atanga natna inkaichhawntheih (e.g. Hepatitis) te tana a hran hlauh hman tur Dialysis khawl neih belh a ni a, hetianga natna inkaichhawntheih veite hi dialysis tih ngai an awm ve reng a. Heng natna inkaichhawntheih veite tan hian dialysis tihna tur chhimlamah hian kan mamawh a. Tin, Aizawlah pawh hospital then khatah chauh an tihsak thei a ni.

Pathianin Kohhrante kal tlangin hna a thawk a, tun tum BCM Assembly ah khan Pathianni zing vawi 1 thawhlawm chu Tualchhung Kohhran zawng zawng ten Dialysis machine leina atan thawh/pe turin a rel a. Hetiang a nih chuan khawl 1 dang kan lei belh leh thei ang a, thisen atanga natna inkaichhawntheih veite pawh Dialysis kan tih sak thei ang a.

Tichuan, he khawl mamawhte tan service tha tak BCM chuan a pe thei dawn a ni. June 2016 ral hmain BCM Headqurters kaltlanga pek tur a ni a, Kohhran member zawng zawng ten thahnemngai takin thawhkhawm leh ila, damlo mangang thih mai hmabakte tan damna leh malsawmna kan ni zel dawn a ni. Khawl pakhat man hi Rs.850,000.00 (Cheng Nuai riat leh singnga) a ni a, hetianga tualchhung kohhran ten Pathianni zing thawhlawm kan chhun tlingkhawm hi Rs. 400,000.00 (cheng nuai li) vel a ni tlangpui a. Chuvangin, kohhran memberten khawl 1 tlin hram tur chuan thahnemngai taka kan thawh a pawimawh hle dawn a ni.

Mi tam tak ten direct taka damlo kan leh tanpui kan thei lo a nimai thei a, hetia damlo tanpuingaite tana kan thawh khawm hi kan tanpui theihna kawng pawimawh tak a ni. Pathianni zing thawhlawm kan chhunkhawm bakah pawh hian mimal, chhungkua leh pawl ang pawhin hemi atan hian pe kan awm thin a, a lawmawm hle a, a pek chhunzawm theih reng bawk a ni.