Mizoram Kohhran hrang hrang hruaitute inrawnkhawmin a rel “Mizorama Kohhran Inzawmkhawm Pawl’ (Council of Churches in Mizoram) din tura hma lak ni se ti-a a rel bawhzuina Drafting Committee Meeting hmasa ber chu March 28, 2023 (Thawhlehni) Chawhma dar 10:30 khan Committee Room No. 1, BCM Headquarters Office, Serkawn-ah neih a ni a.
Meeting-ah hian Kohhran hrang hrang – Presbyterian Church of India (Mizoram Synod), Evangelical Churches of Maraland, The Salvation Army, Lairam Isua Krista Baptist Kohhran leh Baptist Church of Mizoram aiawh te an vaiin mi 10 an kal khawm a ni. He Drafting Committee Convener Rev. R. Lalnunzira’n kaihruaiin, Council of Churches in Mizoram ruangam ruahmanna hrang hrang te thlir ho a nih bakah, chak zawka Council of Churches in Mizoram din thuai a nih theih dan tur ruahmanna te pawh siam a ni.
Heng ruahmanna te hi Kohhran hruaitu te inhmuhkhawmna kumin chhunga Salvation Army ten an thlen turah pharh a ni ang a, hemi hnu hian mahni kohhran ah theuh ngaihtuah ho a ni leh ang.
