November 12-15 (Thawhlehni atanga Zirtawpni) chhung hian Kristian Hospital, Serkawn-a thawktute chuan Rev. Tc. Vanlalmalsawma, Bialtu pastor, Hnahthial ‘S’ Bial Speaker-ah hmangin Retreat an nei mek. He Retreat-ah hian “Hawh u, Lalpa hnenah I kir ang u”, (Hosea 6:1) tih chu thupuiah an hmang.
Hospital-a thawk an nih angin Duty hun leh Damlote enkawl thulh theih a nih loh avangin retreat hi chhawng hnihin kalpui a ni a. A chhawng khatna hi Thawhlehni leh Nilaini-ah thawktu zatve te pualin neih a ni a, a chhawng hnihna Ningani leh Zirtawpni-hian thawktu zatve dangte pualin chhunzawm leh mek a ni.
Kum 1923–a din, Mizorama Mission Hospital hmasa ber, Christian Hopital, Serkawn-ah hian Khum 100, awmin Doctor specialist 4, Medical officer 7 leh Dental Surgeon 2 nên thawktu 154 an awm mêk a. Kum 2018 chhung khan dam lo 23,158 OPD-ah en an ni a, heng zinga mi 3607 admit an ni, nau piang 499 an nei bawk.
