- Upa Dr. B. Laldinliana, Medical Superintendant
Pathian zarah BCM in tihdamna rawngbawlna hna thawhna hmanraw pawimawh tak Christian Hospital Sêrkawn leh Christian Hospital Lawngtlai chuan hma a sawn ve zêl a. Tun dinhmunah chuan Christian Hospital Sêrkawn-ah hian ICU leh Dialysis service te nei ve tain investigation leh treatment facilities lamah pawh hma kan sawn ve ta hle a, heng zawng zawng hi Kohhrante thahnemngaihna vang a ni. BCM Medical and Health Department rawngbawlnaa hriattur pawimawh point thenkhat han tarlang ila:
1. BCM Local Church tinin June 2016 ral hmaa Dialysis khawl pakhat lei belhna tur Pathianni zing vawi 1 thawhlawm thehluh tur kha ngai pawimawh i la, a hma lama theh luh a Dialysis khawl hi neih belh thuai theih nise a lawmawm hle ang. Tunah hian ICU leh Dialysis khawlte hi mi tam tak tan damna a ni mêk a ni.
2. Kristian Hospital Sunday zing thawhlawm Poor fund atana headquarters-a theh luh tur pawh engemawzat hmuh tawh a ni a, la thehlut lo kan awm chuan thehluh zêl ni se. Mi thahnemngai leh kohhrante atangin Poor fund tur hi a lo lut ve reng bawk a, tangkai taka hman a ni.
3. Khawvêl hmasawn zêlah tihdam rawngbawlnaah pawh hmasawn zêl tura kan in buatsaih leh rilru kan put a pawimawh hle a. Tun hnaiah Operation theatre leh Labour room te tih changtlun a ni a. Tunah hian Minor OT tur buatsaih leh mêk a ni a, Digital X Ray unit BCM Property budget atanga lei tura ruahmanna awmsa a ni bawk. Tin, BCM Medical and Health Department committee chuan heng hmanruate hi neih thuai theih dan ngaihtuah nise tiin a rel a, Chungte chu: 1) Ultrasound machine, echo cardiography (lung enna) tih theihna 2) Laparoscopic surgery equipment (Inverha zaina khawl) 3) Laboratory tihchangtlunna tur hmanrua thenkhat. Loan lain emaw Pathian zarah neih theih kan tum dawn a. Tin, Hospital Kitchen, Emergency ward leh Nursing school –a diet and nutrition room & teaching Aids ti changtlun tura hma lak mêk a ni bawk.
4. Christian Hospital Lawngtlai-ah tun hnaiah Cabin 4, Staff sick room 1 leh Duty room 1 buatsaih thar a ni a, tangkai taka hman a ni. BCM Property budget kaltlangin Main building sak chhunzawmna tur cheng nuai 20 dah a ni a, headquarters lama sum lak tur a awm veleh chhunzawm a ni ang.
5. BCM Assembly rorêlnain a rêl tawh, la tih puitlin loh pahnih a awm a, hei hi tawngtainaah hria ila, Pathianin Kohhran hote kaltlangin min la tihpuitlin sak ngei ang.
1) CT scan – tunah chuan mamawhna a lo sâng ta a, mithiamte pawh kan lo nei ta zêl a, CT scan neih ngei hi BCM ang leh chhim lam mipui tan a tul ta hle a, nei thei turin kohhran ten rilru seng ila, hma kan lak thuai a tul ta a ni.
2) School of Nursing-a GNM seat 30 nei tura hma lak pawh hi hemi atana infrastructure buatsaihna tura sum indaih lohna avangin duh angin hma a lak theih lova. BCM-in human resource development atana kan hmalakna upa ber leh pawimawh ber pakhat Nursing School-a seat tam zawk nei thei turin hma chak zawk a lak kan tum dawn nia.
6. Medical and Health Department budget 90 percent hi Department tum tur a nih avangin sum thawhchhuah a ngai a, General ward-a damlo awmte hi tlawm zawka enkawl theihna tur leh damlo thenkhat bill pe thei lo leh ba te an awm thin avangin Cabin leh Deluxe room-a awmte hi chu bat kan phal lo a ni tih hriat a tul a, Cabin/Deluxe-a kan awm duh anih chuan bill ba lova pe thei ngei turin kan in beisei a ni.
7. Damlo kan hun hi Kohhran mipuite hian min ngaih pawimawh sak hram turin kan duh a, In kan hun(visiting hour) lovah chuan luh luih tum lo hram turin kan inngen a ni. Damlo serious deuh pawh hospital chhung leh corridor-a thutpui teuh a rem lo va, OPD lamah awm mai thin ni se. Tin, damlo kan hunah damlo 1 bulah mi 2 aia tam hi awm loh hram nise, kan bawr luai luai hian damloin a chauh phah theih bakah damlo dang tan a ninawmin a hahthlak em em thin a ni.
8. Children Ward-ah hian nau awmna room siam a ni a, heta naupangte khalh tur toys hlui kan fate hman tawh lo rawn pe thei kan awm chuan a lawmawm khawp ang.
9. BCM sponsored a CMC Vellore-a entrance test ti turte kha NEET ziah vek tur a ni a, NEET a tlingte kha interview tura koh theih beisei an ni, CMC Vellore hian interview conduct thei tura phalna a buaipui mek. NEET kaltlang lova CMC Vellore-a entrance test neih leh a nih theihna tur hian Kohhran hote kan tawngtai zêl dawn nia, NEET kal tlang zêl anih chuan sponsorship privilege hian awmzia a nei vak thei dawn lo a ni.
Engemaw thil pawimawh leh information-te la rawn tarlan zeuh zeuh kan tum dawn nia. Lal Isua Krista rilru pu-a tihdam rawngbawlna hi staff leh students ten kan thawh zêl theihna turin min lo tawngtaipui reng dawn nia.
