Christian Hospital, Serkawn leh Lawngtlai chungchanga hriattur thenkhat chu Baptist Today - July 3, 2016 Issue-ah chhuah tawh a ni a.  Thil pawimawh thenkhat Kohhran mite hriattur tarlang leh ila:-

1.Thu chhuah hmasaah khan in kan hun (visiting hour) ngai pawimawh turin kan in ngen a. visiting hour kan hriat theih nan tarlan thain a lang a, hetiang hi a ni e:

Zing (Morning): 6:30 – 8:30 AM

Chhun (Noon):  12 noon – 1:00 P.M.

Tlai(Evening):   3:00 P.M. – 5:00 P.M.

Pathianni tlai (Sunday): 3:00 P.M. – 4:00 pm. Pathianniah hian damlo kantu an tam a, damlo te hian an chauh phah hle thin a, chuvangin inkan hun hi tihtawi a ni.

 2. A remchang angin Peripheral Clinic hi neih ve thin a ni a. Clinic neih mamawhte chuan Dr.B.Lalrinzauvi deputy Medical Superintendant Mobile No. 9436371802 contact thin nise. Thawktu remchan leh hun neih dan azirin clinic hi neih thin a ni. Tun dinhmunah chuan Lunglei leh Lawngtlai District bak hi chu kan cover phak chiah lo deuh. Tin, Clinic kan neih hian hriattur pawimawh thenkhat chu: Kal man hi Hospitalin kan tum a, inentir man hi free a ni bawk. Mahse, damdawi man leh investigation man hi chu Serkawn/Lawngtlai rate-in damlo ten an lei/chawi a ngai ve thin. Tute emaw harsa zual bik takte an awm anih chuan Kohhran hruaituten lo sawiin engemaw chen chu concession ve theih dan a awm bawk ang. Lawngtlai district tan chuan SMO i/c Lawngtlai biak rawn thin phawt nise.

3.Blood Bank-a thisen a awm that hian damlo ten an chhawr tangkai em em thin a, mi tam takin an dam phah a ni. A bik takin thingtlang lama harsa zawkte, khawpuia chhungte han pun mai tur nei lote tan a hlu lehzual em em thin. Thisen man hi a awm lo, amaherawhchu, thisen a thianghlim leh thianghlim loh test hrang hrang 4 lai tih man hi hlep awm lovin dam loten an chawi ve a ngai a, hospital-a awmte chu Laboratory bill-ah telh mai a ni thin. Thahnemngai taka pe thinte chungah kan lawm em em a ni. Pawl ho anga pe duhte chu an awmnaah kan kal chilh thei a. Pe duh kan awm anih chuan Deputy Medical Superintendent emaw Dr. Hmingthanmawii (Dr Puii) Blood Bank officer mobile no. 9402329435/8415843580 hnenah hriattir a, ruahmanna siam nise. Thisen kan mamawhna hi a sang chho ta hle a, midangte nunna chhanna turin tam zawk pek zel kan tum dawn nia. Blood bank Vehicle ang chi kan nei lova, thisen hi kalkawnga a chhiat hman a hlauhawm thin avangin hmun hla tak erawh kan kal thei chiah thin lova, hmun hlat dan azir leh kawng that leh that loh dan azirin hmun hla deuhte chuan a chunga tarlante hi kan be rawn thin dawn nia. Lawngtlai district tan erawh chuan Christian Hospital Lawngtlai-a blood bank a la awm loh avangin District Hospital Lawngtlai blood bank ah pek nise. Heta tang hian kan hospital pawh min pe chhuak ve mai thin.

Related Links: Christian Hospital -Hriat tur pawimawh(1)