Paithar bial Seminar
Paithar pastor bial chuan June 15-17, 2012 hian Sihtlangpui Biak inah Upa leh Rawngbawltu Nupuite pual Seminar an buatsaih a. MBKHP atangin Pi Zosangi, Pi H. Lalkimi leh Pi F. Lalrochami ten an hmanpui.
Aizawl West ABC Zaipawl Intihsiak
June 15-16, 2012 khan Aizawl West ABC chuan an ABC huam chhunga Kohhran zaipawlte pualin Kanaan Biak inah intihsiak an buatsaih a. Report kan ziak lai hian Kohhran zaipawl 15 tel turin an in-report a; lawmman pawh Kohhranin tum lovin mi thahnemngaite kal tlangin tha tak tak an inpe.
Lunglei South ABC fehchhuak
Lunglei South ABC hruaitute chuan vawiin Pathianni hmang hian an ABC huam chhung Kohhran pasarih-ah an fehchhuak dawn a. Heng Kohhrante hi tlawh tura an beiseite chu a ni: Gilead-Thualthu, Thualthu, Bualte, Thaizawl, Dawn leh Luangmual Kohhrante.
Christian Hospital Serkawn May Chanchin Thar
May thla chhunga Christian Hospital Serkawn dinhmun tlangpui ziaka Baptist Today-in a dawn danin Inentir zat 2892 zingah mi 411 admit an ni a. Nau piang 62 awmin mitthi 6 an nei. Heng bakah hian Major Operation 57 leh Minor Operation 38 an nei a, Laboratory exam 1425, Endoscope en zat 22 leh Ultrasound en zat 108 an nei.
Evangelist-te Rawngbawlna
Kan hriat theih chinah kan Evangelist team ten hetiangin rawngbawlna an nei mek hlawm:
- Chanchin |ha Chhuangtu team (Evan.K. Lalenga) te Khawmawi Kohhranah.
- Thlaraubo Veitu team (Evan. Lalzama) te Chhumkhum Kohhranah.
- Ebenezer Ministry (Evan.Vanlalmawii) te Chhipphir bialah.
- Krista Kraws Chhuangtute team (Evan.TC. Lalchhandama) te BCM Bazar Lawngtlaiah,
- Thutak Puangtu Team(Evan.Dengdailova)te BCMCheural,
- Gospel for All (Evan.Lalnuntluanga) BCM Ramthar Lunglei.
- Gospel Herald(Evan. Lalhulliana Chhangte) te BCM Bazar Lungleiah.
FOD Director BCM Electrict Lungleiah:
Rev.R.Lalbiakliana FOD Director chuan BCM Electrict biakin ah dt.17.6.2012 hian Naupangte pawimawhna tih thupui hmangin KNP pualin hun a hmang ang.
Mission News
Mission Field Account Audit dawn:
Kum 2011-2012 chhunga Mizoram pawna kan Mission Field sum vawn dan chu kar leh Jnue 20-23 chhung hian Guwahati-ah endik a ni dawn a. Field hrang hrang atangin Account vawngtute kal khawmin Headquarters atangin Assembly in Auditor tura a ruatte nen Guwahati-ah an inhmukhawm dawn a ni.
Mission Convention :
June 15 – 17, 2012 hian Hnahthial ‘N’ Pastor Bial Mission Convention, BCM Hnahthian Bazarah Rev. Dr. K. Lalrinthanga, A.G.S, Mission chu Speaker a ni ang a, Tawipui ‘S’ Kohhran Mission Convention-ah Rbt. H.S. Lalhmingthanga, Mission Promoter chu Speaker a ni bawk ang.
Tin, June 23 – 24, 2012 hian BCM Ramrikawn, Pangzawl Mission Convention-ah Mission Promoter hi Speaker a ni dawn a. Mission Focus buatsaih turin Pu C. Lalengkima, BCM Audio-Visual worker a kal bawk ang. BCM Edenthar, College veng, Lunglei nula zaithiam Nl. C. Lalmuanpuii pawhin Pathian fak hla sain Mission Promoter hi tawiawm a tum.
Work Camp :
June 5 – 13, 2012 khan Zemabawk Pastor Bial, Aizawl Mission hruaitu 6 chuan Tripura Field Hqrs. Agartala-a Clerk Quarters Work Camp-in an sak sak. June 15, 2012 khan BMP Ramhlun ‘N’ Unit, Aizawl member 15 vel chu, Mar ‘S’ Chakma kohhran Sunday School Hall Work Camp-a sa turin an liam thla. Hna tha taka thawk a, Missionary te leh Mar ‘S’ kohhran te nena thlarau lama inpawlna hlim taka nei chunga rawng an bawl theih nan, i tawngtaipui ang u.
Mission Campaign :
June 15 – 17, 2012 hian BCM Thingkah, Lawngtlai ‘N’ Bial chuan Mission Campaign (beihpui) neiin, Rev. K.V. Thanga, Lunglei Bazar Bialtu Pastor chu Resource Person atan an hmang. Ani hi Tabithians, BCM Edenthar-ten zaiin an tawiawm.
Kristian ten harsatna tawk
Assam-Bengal Field Boro Area-a Boro (Hindu) Kristiana inlet tharte chu an Boro-pui ringlo miten an thil neih te chhuhsakin, khua atanga hnawh chhuahah te an vau f ova. An inkhawm tura kal te pawh an lo dang thin. An tan chuan Isua Krista rin hi a man a sang hle mai! An rinnaa nghet taka an din a, Chanchin Tha meichher eng tak an nih theih nan, chhelna leh Thlarau Thianghlim tih chakna i dilpui ang u.
Chakma Mission-a kan thawhna Betbunya, Longpuighat-ah pawh tunlai hian Chakma Buddhist-ten Kristiana inlet te hi an vau thin a, an sawi thaih a, tih zam tumin kawng hrang hrangin an bei mek bawk. Buddhist Bante(Puithiam) kum 9 lai lo ni tawh nikum December-a Kristiana inleta, Baptisma chang ta - Tv. Riton Chakma phei chu Bangladesh-a an puithiam lo kalin a rawn thlem bakah, Longpuighat-a Buddhist hovin harsatna an siam sak deuh reng a. A ni hi Class X, Hindi B.A a ni a, Betbunya-a BCM Mission sikulah Evangelist Teacher a chhawr mek a ni. Betbunya, Longpuighat-a Chakma ringthar te hi an vaiin member 50 vel an tling tawh a. Biak in hmun zawn mek a ni a, sak thuai beisei a ni.
