#Aizawl Area BKHP Coordination Committee hmalakna in August 15, 2023 (Thawhlehni) khan BCM Biak In, Chaltlangah Aizawl khawpui chhung BKHP unit hrang hrang te huap in Chhawmdawlna In Awareness Campaign a buatsaih a. Pi Hmangaihkimi, Chairman Aizawl Area BKHP Coordination Committee in a kaihruai a, Pi Lalbiaktluangi, Secretary, hnen atangin report ngaihthlak a ni. BKHP Bawngkawn Unit atangin Group zai ngaihthlak niin, Chhawmdawlna in chungchanga zirtirna Dr. Chawngthanpari hnen atangin ngaihthlak a ni.

Chhawmdawlna In Awareness Campaign-ah hian Aizawl khaw chhung Pastor Bial 10 (sawm) atangin Bial BKHP Executive Committee member te bakah Aizawl khawpui chhunga Unit 62 aiawh mi 2 (pahnih) theuh tel tura inkohkhawm an ni a. Mi 250 an kal khawm a ni.

#Electric Pastor Bial BKHP huap in August ni 15, 2023 (Thawhlehni) bawk khan BCM Biak In, Chanmari Vengthlangah Chhawmdawlna in Awareness Campaign hi neih a ni a. MBKHP hruaitute Dr. Zoramthangi, Fin. Secertary, Pi ZD Vanlaldiki, Executive Committee member leh Pi Vanlalthuami Grace Society Board mermber ten hun an hmang a. Chhawmdawlna In  chanchin tlangpui leh report te tarlangin, hmasawnna tur leh tan lak a tulna hrang hrang te an sawi a, Chhawmdawlna In atana hma thlir hrang hrang te an tarlang bawk. He hunah hian Bial BKHP member 70 vel kalkhawmin hun tha tak an hmang a ni.