September 8, 2012 (Karleh Inrinni) 10:00AM to 6:30PM hian Mizoram Baptist Kohhran chuan Rampum huap Awmni khama Chawnghei Tawngtai programme a buatsaih a. Tualchhung Kohhran tinin mahni Biak In theuh-ah he hun hi an hmang dawn a ni.  Hemi chungchangah hian BCM General Secretary, Rev. H. Lianngaia chuan Kohhranhote mahni hmun theuhah tih tak zeta hmang turin a chah. Hetiang hian Programme siam a ni:-

1.      A hun    :   September 8, 2012 (Inrinni, 10.00 Am – 6.30 Pm)

            A  hmun :  Tualchhung Kohhran Biak In theuh.             (a)   10.00 Am - 12.00 Noon  -           Session I             (b)   1.00 Pm -   2.30 Pm           -         Session II.             (c)   3.00 Pm -   4.30 Pm           -         Session III             (d)   5.00 Pm -   6.30 Pm           -         Session IV Heng hun ruat hi inkhawm anga hman ni se. Hruaitu ruat te, thuchah sawitu ruatte leh tawngtai Item chipchiarte chu Tualchhung Kohhranin emaw Tawngtai hruaitu apiangin emaw an duh angin sawi zau, siam belh ni se. Tlai lam hi chawnghei tawngtaia hman ni se. Hun hman khah leh thawl dan azirin hla sak emaw, sharing emaw telh theih a ni ang.  

.......................................

SESSION  KHATNA:

A hun: 10.00Am -12.00Pm

  Bible chhiar : Sam 7: 1-2; Phil.4:4-6; Sam 32:5 - 7  

Tawngtai vawi 1-na:     Lawmthu sawina:

 1.  Pathianin kan ram chanchin tha min pek avangin leh chanchin tha avanga malsawmna tam tak kan dawn avangin. 2.  Pathianin kohhran min din avang leh Kohhranho hmasawnna thar zel min pek avangin. 3.  Kohhrana rawngbawlna chi hrang hrang full time-a thawk tur mi inpe an la awm  zel avangin. 4.  Kohhranhote enkawla thu leh hlaa kaihruaitu hruaitu hrang hrang min la pek zel avangin. 5.  Thilpek rawngbawlnaa hma kan sawn zel avang leh kan mamawh ang zel pe theia malsawmna kan dawn avangin. 6.  BCM hi zaikhata luang (Centralised)-a inpumkhatna tha tak neia kan la kal zel theih avangin.  

Tawngtai vawi 2-na:  Sual thuphachawina leh ngaihdam dilna.

 1.  Pathian malsawmna hmang thiam lova nawmchenna leh sual rawngbawlna atan kan hman thin avanga thupha chawina. 2.  Kan ram politics kal dik lo leh hman sualna avanga thupha chawina. 3.  Kan rama eirukna leh thuneihna hman dik loh (Corruption) hluar ta lutuk avanga thupha chawina. 4.  Tualthahna leh ruk ruk lo pung zel avanga thupha chawina.  

Tawngtai Vawi 3-na : Sual thupha chawi leh ngaihdam dilna (Chhunzawmna)

1.  Hmeichhiat mipatna hman khawloh (Sexual abuse) lo hluar ta lutuk avanga thupha chawina. 2.  Hmangaihna leh rinawmna nun kan tlakchham avanga thupha chawina. 3.  Pathian thupek zawm leh Pathian tihna kan tlak chham avanga thupha chawina. 4.  Kan bawhchhiatna nia kan hriat apiangte Pathian hnenah thupha chawiin ngaihdam dil ila.  

Tawngtai vawi 4-na:     Ram tana Dilna

 1.  Kan ramah rorelna tha leh dik a lo awm theih nan. 2.  Politics thianghlim kan neih theih nan. 3.  Kan ramah helna leh inrikrapna awm lova thlamuang leh zalen taka kan chenho zel theih nan. 4.  Mipuiin kan chanvo dik tak kan chan zel theih nan leh kan hamthatnate kan hman thiam nan.  

Tawngtai Vawi  5-na : Ram tana Dilna (Chhunzawmna)

1.  Kan ram hi ei leh bar (economic)-a kan in todelh ngei theih nan. 2.  Kan ram leilung hausakna hmuhchhuah leh haichhuah  a niha kan chhawr tangkai theih nan. 3.  Kan ram hian zirna (education & Training) chi hrang hrang a neihte hi mihring nun siamthatna leh thiamna tak tak (Quality) pe chhuak thei tura zirna a nih theih nan. 4.  Kan ram hi chhiatrupna lo thleng thei laka kan him theih nan.    

SESSION  HNIHNA:

A hun: 1.00pm – 2.30pm

  Bible chhiar tur : II Chronicle 7:11 – 16;     Sam 22: 28 – 31; Tirh. 16:25 - 28  

Tawngtai vawi  1-na: Kohhran tana Dilna

  1.  Kan ramah hian  harhna a lo thlen theih nan. 2.  Mission field-ah harhna a lo thlen theih nan. 3.  Kohhran-a rorelna leh Committee chhawng hrang hrangte Pathian duh dana kalpui a nih zel theih nan. 4.  Kohhran hrang hrangte inkarah tun aia inhriatthiamna thuk zawk leh thawhhona tha zawk a lo awm theih nan.  

Tawngtai Vawi 2-na : Kohhran Tana Dilna (Chhunzawmna)

1.  Kohhran miten sual huatna tak tak kan neih theih nan. 2.  Kohhran mite hian Pathian thu ngainatna neia kan nunpui tak tak theih nan. 3.  Kohhran miten Thlarau leh tihtak zeta Pathian chibai kan buk theih nan. 4.  Rinna kawnga chak lo – tlu, hnungtawlh leh thunun laite Pathiana an lo harhchhuah leh theih nan.  

Tawngtai vawi 3-na :    Ram leh Khawtlang HruaituteTawngtai sakna

1.  Chief Minister, Ministers, MLA, MP-te tan, Pathian tih chunga mipui tana ro an rel theih nan. 2.  District Council pathum kan neihte tan – an CEM te, an EM te leh an MDC  zawng zawngte tan. 3.  Khaw tina Village Council/Local Council- ten dik tak leh duhsak bik nei lova mipui rawng an bawl theih nan. 4.  Political party hruaitu leh worker-ten pamhamna leh mahni hmasialna kalsana dikna leh rinawmna nena ram tan an thawh theih nan. 5.  Kan rama NGO zawng zawng –te hian rinawm tak leh tangkai taka rawng an bawl theih nan.  

Tawngtai Vawi 4-na : Ram leh Khawtlang hruaitute (Chhunzawmna)

1.  Sawrkar hnathawk zawng zawngte tan. Eirukna hi an huata, hlepna leh thamna lakah an fihlim theuh theih nan. 2.  Kut hnathawktuten taima tak leh hlawhtling taka an thawh theih nan. 3.  Sumdawngten duhamna avanga bukna dik lo hman leh inbumna nena thil an tih lohna turin. 4.  Contractor- ten hlep tam tum luat avanga rinawm lo tak leh tha lo taka hna an thawh loh nan.    

SESSION  THUMNA

A hun:  3.00 PM – 4.30 pm

Bible chhiar tur :  II Chro. 29:11; Isaia 40:11;  Thufingte 24:11 -12

Tawngtai vawi   1-na:     Kohhran Hruaitute Tawngtai sakna:

1.  BCM Puipate - President, President Elect, GS, AGS Mission, AGS Services – te tan. 2.  Executive Secretary Aizawl leh Lawngtlai, Head of Deptt. leh Head of Institutions - te tan. 3.  Bialtu Pastor leh Probationary Pastor zawng zawngte tan. 4.  Bial neilo Pastor (Minister) zawng zawng-te leh Pastor Pension tawh la damte tan.  

Tawngtai Vawi  2-na : Kohhran Hruaitute Tawngtaisakna.(Chhunzawmna)

1.  BCM  Assembly Committee member hrang hrangte tan – AEC, Nomination, Central, Mission leh Service Committee-te tan. 2.  BCM Department hrang hranga  thawktu zawng zawngte leh Headquarters Serkawn, ES Office Aizawl leh Lawngtlai-a thawktute tan. 3.  Kohhran Upa leh Rawngbawltu zawng zawng-ten Thlarau Thianghlim tanpuinaa Kohhran fel taka an hruai theih nan. 4.  BKHP, TKP, BMP, KNP –te tan -  Mizoram, Bial leh Unit tina hruaitu theuhte tan. 5.  BCM recognized Evangelistic Team 44 kan neih mekte tan.  

Tawngtai vawi  3-na: Mission Rawngbawlna tan Tawngtaina:

1.  Mission Field hrang hranga hruaitu – Regional Director, Field Directors, Area Supervisors leh Circle i/c –te tan. 2.  BCM Mission hnuaia missionaries-ten tihtak zeta Pathian ram tan an thawh zel theih nan leh an thawhna mite hmangaihna tak tak an neih theih nan. 3.  BCM Mission field thar - Chakma Mission leh Arunachal Far East Field- te puitling taka a indin chhuah zel theih nan. 4.  Bengali leh Mok (Zakhai) hnam zingah rawngbawla kan luh thuai theih nan.  

Tawngtai Vawi   IV-na : Mission tana Tawngtai (Chhunzawmna)

1.  Mission School  zawng zawngte hi Chanchin Tha hrilhna hmun a lo nih tak tak theih nan. 2.  Mission Field hrang hranga ringtu tihduhdahna leh nekchepna tuartuten chhelna leh nghehna an neih zel theih nan leh an tuarna rahchhuah duhawm tak a lo thlen theih nan. 3.  Kohhran mipuite rilruah thlarau bo veina thuk zawk a intuh zel theih nan. 4.  Bru Baptist Kohhran a lo than lena a lo puitlin zel theih nan leh an hruaitute tan.  

SESSION  LINA:

A hun:   5.00 pm – 6.30 pm

Bible chhiar tur :   Deut.6:1-9; Joela 2:12-14;   Rom 12:1-2  

Tawngtai vawi 1-na : Chhungkaw tan

1.  Kan ram chhungkaw tina Pa ber-ten chhungkaw lu an nih ang taka, tisa leh thlarauva pa nihna nen chhungkua an hruai theih nan. 2.  Chhungkaw Nu berten mahni in chhungkhur theuh Krista lalna hmun ni tura an buatsaiha an enkawl theih nan. 3.  Thalaite rilruah nu leh pa zahna leh an thu pawisakna a lo san deuh deuh theih nan. 4.  Kan ram thalaite hi taihmakna kawnga an lo than len  theih nan.  

Tawngtai Vawi 2-na :  Chhungkaw Tan (Chhunzawmna)

1.  Naupangte nunah Pathian tihna tak tak a intuh zel theih nan. 2.  Chhung tinin ‘Chhung Inkhawm’ kan neih theih nan. 3.  Chhungkaw eizawnna kawng thianghlim lo kan thlauh thlak ngamna turin. 4.  Biak In-a Pathian chibai buk leh Kohhran programme-te hi chhung tinin tun aia kan ngaih pawimawh zawk zel theih nan. 5.  Chhung tinin sual dona kawnga tan kan laka, Kristian chhungkaw din tharna thinlung kan put  theih nan.  

Tawngtai vawi 3-na:  Khawtlang Sualna

1.  Ruihhloin a tihbuaite tan; an sim theihna tura Lalpa  an zawn thiam theihna turin. 2.  Ruihlo ngaite enkawlna -  Kohhran leh Sorkar leh NGO-te buatsaih Centre hrang hrangte tan. 3.  Ruihlo dona kawnga thawktu YMA te, Police leh Exise Force-ten tihtak zeta an thawh zel theih nan. 4.  Ruihtheih thil zuartu-ten Pathian atanga simna tak tak an neih theih nan.  

Tawngtai Vawi 4-na : Khawtlang Sualna

1.  Kan ramah  HIV/Aids  darh zau zel lova a lo bo zawk theih nan. 2.  Pawngsual leh tualthah lo awm thin hi a lo reh theih nan leh hetiang titute hian Pathian leh an mihringpuite pawi an sawi a ni tih an inhriata simna an neih theih nan. 3.  Khawl thila hmasawna – Tv,  Computer, Cellphone, etc-te hi a chhe zawnga hmang lova, a tangkai zawnga kan hman thiam theih nan. 4.  Kohhranin khawtlang sualna kan dona kawngah huaisen tak leh taima taka ke kan pen zel theih nan.  

Tawngtai vawi  5-na:    Inhlan tharna:

1.  Kan rama thil tha lo inzep tlat tireh tur hian kan theih ang tawkah tawngtai leh thiltihin kan lantir zel dawn a ni, tia inhlanna. 2.  Chhungkaw Maicham, mei mit lova  kalpui zel tura inhlan tharna. 3.  Politics kal sual laka inveng tlat tura inhlanna. 4.  Hlepruk leh suma duhamna avanga midangte tihchhiat theihna laka inthiar fihlim tura inhlanna. 5.  Missionary-te puala tawngtaina nikhatah vawikhat tal nei tura inhlanna. 6.  Pathian hminga zuk leh hmuam sim tura inhlanna (zuk leh hmuam tite tan). Kan taksa Lalpa duhzawng tih nana inhlanthar leh na. //.    

“ Tawngtai hlawhtlintirtu, kan dil hi ngaithla la,

I van malsawm hlu chu, vur ang che kan chungah.”

 

 ..........……