Mizoram Baptist Kohhran hnuaia Chakma pastor hmasa ber ni tura kum 1988-a nemngheh Rev. Docksan Tong (64) chu June 29, 2015 (8PM) khan Christian Hospital Lawngtlai-ah a thi. Rev. Dockson-a hian a nupui leh a fate 4 a kalsan a ni.
Pu Dock-a hian June 28, Pathianni khan a bial chhung Bolisora Kohhrana Sacrament a buatsaih laiin nikhaw hre lovin a awm a, Lawngtlai panpui nghal a ni a, Lawngtlaiah hian zan khat pawh riak hman lovin Lalpa hnenah a chawl ta a ni.
Amah thlahna-Inkhawm-ah hian Mizoram Baptist Kohhran iawhin Rev. F. Ramdinmawia, Executive Secretary, Rev. V. Vanlalchhunga leh Pastor R. Lalrintluangate an kal a, BCM aiawhin thu tawrhpuina thu an sawi a ni. Rev. Docksan Tong hi Chakma Kristian pumpui leh BCM hian a ui tak zet a, amah ang hi Lalpan min pek leh ngei theih nan dil ila, a kalsan tak a nupui fanaute, kohhranhote leh a thawhpuite Lalpan thlamuanin awmpui rawh se.
Rev. Docksan Tong hi chakma hnam hnih Tongtongya leh Anukya hnam zing a Tong hnam a ni. 15th April 1951 khan a piang a, a pa hi Kajoramni Tong niin a nu hi Gagoii Tong a ni a, a nu leh pa hi Pathian thu awi tak, Pathiana innghat tlat an ni a, tunah hian an boral ve ve tawh a ni. Rev. Docksan Tong hi kum 1969 khan Rev. C.Lawmzuala'n Hmunnuam khua-ah baptisma a chantir. Kum 1981 ah Nl. Phulomugi Tong nen Rev.H.Killuaia'n Dan puitlingin a inneihtir a, fapa 4 leh fanu 1 an nei. An fanu neihchhun hi BCM Missionary Nurse hna thawk lai mek a ni a, an fapa pakhat hian AICS ah BD a zir mek a, midangte pawh graduate ni tawhin nu leh pa thuawi tak tak a ni. 1970 ah Baptist Mission School ah Class III a zir zo va, 1974 ah BMS, Vaseitlangah Class VI a zir zo. Kum 1978 ah Zoram BAptist Mission-in Chakma hnam zing a thawk turin a la a. Kum 1980 ah Jubilee Bible School, Serkawn ah a zir a, 1983 ah Aizawl Theological College ah Missionary Training na hmunah kaltir a ni. Kum 1985-ah Probationary Pastor atan lak a ni a, 13th March 1988 BCM Assembly ,BCM Biak In, Zotlang ah Rev.Dr. CL.Hminga, General Secretary-in minister puitling atan a nemnghet. Rev. Docksan Tong hi chakma hnam zingah hmun hrang hrang- Chawngte, Serhuan,Tlabung, Jognasuri, Vaseikai,Kamlanagar,etc ah te a thawk tawh a. Kum 2013 a Chakma Baptist Church a lo din khan Longpuighat Circle incharge a dah a ni a, tun thlengin hetah hian a awm a ni.
