May 5, 2013 (Pathianni) hian Kamalanagar (Chawngte C) ah mahni kea ding turin Chakma Baptist Church (CBC) chu hawn a ni dawn ta a. He inkhawm hi Mission Coordinator, Rev.B. Lalrinawman a kaihruai ang a, General Secretary, Rev.H. Lianngaia’n a hawng ang. Hemi ni vek, Chawhnu lamah hian Chakma Baptist Church Office, Chawngte ‘C’ ami chu Rev Dr K Lalrinthanga, AGS i/c Mission-in a hawng nghal ang.
Chakma Baptist Church hi politics leh thil dang kaihhnawih engmah nei lova Mizoam Baptist Kohhran-in Pathian ram a lo zau zelna tura rawngbawlna huang a zauhna a ni a. BCM thlazar hnuaiah kum 5 chhung enchhin a ni ang a, chu mi hnuah a kal zel dan tur chu la ngaihtuah that leh tur a ni.
Mizoram Baptist Kohhran rorelna sang ber, BCM Assembly 2013 -ah Chakma Baptist Church din tura ruahmanna chu pawm a ni a. A din dan tur chungchang Mission Board Meeting in a thlir hnu-ah Administrative Working Committee chuan Ni 5 May, 2013 ah hawn turin a rel ta a ni.
Chakma Mission Chanchin Tlangpui:
Chakma hnam zingah kum 1939 atangin kan thawk tan a. Harsatna tamtak a thlen hnu ah, Kum 1978 khan Chakma Mission dinthar leh turin ruahmanna siam a ni a, Home Mission pawh din a ni. Assembly 1990 chuan Chakma Mission chu Field a awm turin a rel a, Field Director atan Rev C. Lalthlamuana dah a ni. Reilote hnuah ruahmanna thar siamin Education Department hnuaiah a awm a. BCM Planning Commission 2001 rawtna angin Ramchhung Mission Department hnuaiah dah a ni leh ta a.
M&E Committee 5&6 Dec, 2006 chuan Chakma zinga kan rawngbawlna revise turin a hria a. Ruahmanna siam turin Sub-Committee a siam a. Ni 14 Dec, 2006 Sub Committee chuan ruahmanna thar a siam ta a. January 2007 Assembly Executive Committee chuan Chakma Mission Planning thar a pawm a, Assembly ah thlen a ni a. January 2008 ah Chakma Mission i/c atan Rev J. Lalduhawma chu dah a ni tan ta a. January 2009 ah Chakma Mission i/c atan Rev. ZD Rodingliana dah a ni leh a.
Planning Commission 2011 chuan Assembly 2007 thurel bawhzuiin Chakma Mission a hrana enkawl, Chakma Mission enkawl turin Chakma Mission Director dah, Mission Headquarters atan Kamalanagar hman a rel a. Chakma Mission Committee din nise, chumi hnuaiah chuan Circle pali a awm ang tiin a rel a. Chakma Mission huamchhung a kum sawm (2011-2020) chhung hmalak dan tur pawh a duang nghal a.
Chakma Baptist Church din chhoh dan :
Planning Commission ruahmanna awm mek umzui-in Chakma Christian Leader mi 11 te chuan 3rd May, 2012 khan BCM Administrative Committee ah Chakma Baptist Church din an duh thu an thlen a. 23rd Aug, 2012 ah BCM Administrative Working Committee ah mi 10 tel chho lehin BCM in Chakma Baptist Church din dan tur Write Up a buatsaih sawiho a ni a. Central Committee leh Executive Committee Aug 2012 chuan Write Up (Chakma Baptist Church Structure) chu a thlir a. Assembly a ngaihtuah turin a tlen ta a. BCM Assembly Vawi 117-na chuan 8th March, 2013 khan Chakma Baptist Church din a rel thlu ta a ni.
Tun hnai Chakma Baptist Church Dinhmun:
Tunah chuan Chakma Baptist Church Headquarters atana ruat Chawngte C (Kamalanagar) ah Chakma Mission Director, Rev.RC. Lalthanzama kaihhruaina hnuaiah an awm phawt ang a. A ni hi CBC Administrative Officer, Executive Secretary leh Finance Manager a ni bawk ang. A hnuaia mi hi tuna CBC dinhmun tlangpui chu a ni a.
1. Chakma Baptist Chuch-ah hian Tualchhung Kohhran 41 leh Fellowship 17 a vaiin 58 a awm mek a, Pastor Bial Pali ah then a ni ang.
2. Kohhran Inchhiarna 2012 September a neih ah khan member 4783 kan awm a. Inchhiar hnu leh kum 2013 a Baptisma chang thar leh pawl dang atanga lolut nen member 5,000 chuang an ni tawh.
3. Kum 2012 chhungin Ringthar baptisma chang 564 an awm. Hetiangin:-
(1) Longpuighat Circle - 31;
(2) Chawngte Circle - 124;
(3) Tuichawng Circle - 296;
(4) Marpara Circle - 113.
4. Hengah te hian kum 2012 chhungin Fellowship thar a ding. Chungte chu
(1) Chikhurlui - member - 24,
(2) Chhotapansury - member - 35,
(3) Kawrpuichhuah - member - 121,
(4) Zorolodubasora - member - 56.
Fellowship ni thin, member pung zel avang leh an lo puitlin tawh avangin Borkholok leh Bolungsury te Tualchhung Kohhran ah hlankai an ni bawk.
5. Kum 2013 chhungin Baptisma chang thar mi 101 an awm leh ta a. Hengah te hian Fellowship thar a ding bawk: Dampuiparah member 47 leh Chawilung-ah member 40.
6. Kum 2012-2013 Financial Year chhungin Missionary Quarters hengah te hian sak a ni- Chhotaguisury; Mainiabapsora; Phairuangkai; Kawrpuichhuah; Tuikawi. Tin, Phairuangkai ah Primary School kan sa thar bawk. Tin, School budget in Evangelist Quarters sak a ni bawk: Betbunia (1), BBS Chawngte (2), Tuichawng (1), leh Marpara (1) ah te.
7. Heng hmunah te hian tun hnaiah Biak in thar a ding. Kamtuli, Parva-I, Chikhurlui, Vairawkai, Thanzamasora, Sedailui (L), Zorolodubasora, Chhuahthum, Rolui, Ziro, Suguarbasora, Samuksury-ah te.
