Vawiin May 18, 2017 hi MBKHP-in Chhawmdawlna In a din kum 17-na (17th Anniversay) a ni a. Hemi denchhen hian mipa awmna tur (Boys Hostel) Building sak mek chu tukin zing dar 7:00 khan BCM General Secretary, Rev. F. Ramdinmawia’n a lungphum a phum.
He Lungphum Programme hi Pi F. Lalrochami, President, MBKHP-in a kaihruai a, Pi Lalnunzami Chawngthu, Project manager, MBKHP Chhawmdawlna-in chuan Building sak bul tan dan leh sak chhoh a nih dan (Technical Report) a pe a. General Secretary chuan enkawl laite leh thawktute tana fuihna thuchah sawiin, MBKHP-in hetiang Project lian leh harsa tak a kalpui leh an inpekna avanga mi tam tak chhanchhuah an ni thin chu lawmawm a tih thu a sawi a. Chhawmdawlna-ina thawktu te inpekna leh MBKHP rawngbawlna chu fak tlak leh chhuanawm a tih thu uar takin a sawi. Thusawi tawp-ah tawngtaiin programme a khar.
MBKHP Chhawmawlna-in hi Serkawn Melte ram, Khawiva Road-ah a awm a din a ni a. Tunah hian an building ten a zawh loh avangin awmna chang lo (waiting List)-ah engngemawzat an awm mek a ni. Tunah hian enkawllaite awmna tur in pathum sak belh tuma hma lak mek a ni a, tun ami hi a pakahatna tur a ni. Kum 2018-ah luah hman tura peih fel tum a ni.
MBKHP Chhawmdawlna-in hi kum 1990-ah Relief & Development Department, BCM nen tang kawpin bul tan a ni a. Kum 10 chhung chu The Sharing Way, Canada ten rawn tanpuiin sum leh Motor te an rawn pe a. Tunah hian MBKHP hian ‘Grace Society’ tih hmingpu-in Sorkar-ah a register a, Grace Society hnuaiah hian Drop-in-Centre leh Chhawmdawlna-in hi a enkawl a ni.
