Canadian Nula-te[/caption]
Kum engngemawzat atanga kan lo kalpui tawh angin Relief & Development Department, Baptist Church of Mizoram leh Global Youth Volunteer Network (GYVN) te thawh hona in University of Guelf atangin thalai hmeichhia mi 7 te chuan BCM, Relief & Development Department an rawn tlawh leh mek a. Thlakhat chhung hun hmangin BCM, R&D hmalaknate an enpui dawn a ni.
May 5, 2016 khan anmahni lawmna inkhawm (Welcome Programme) BCM, R&D Hall, Ramzotlangah neih a ni a. R&D Director Pu Lalrinawma’n Programme a kaihruai a, GYVN nen thawh ho dan tur report a pe. He programme hi Rev. F. Ramdinmawia - General Secretary leh Rev. R. Zohmingliana-Associate General Secretary i/c Service ten an hmanpui a, GYVN te nena thawhhona kawnga sul lo sutu leh R&D Director kal chhuak ta Pu Ms Dawngliana, tuna BCO Manager hna chelh mek pawhin he hun hi a hmanpui bawk.
Global Youth Volunteer Network (GYVN) hi Khawvel pum huap a Social Works leh Relief lam hna thawk leh intanpui tawn tura thalaiin pe (Volunteers) inzawm khawm an ni a. Khawvel hmun hrang hrangah Social Works leh Relief lam hna thawk turin an feh chhuak thin a ni. A tlangpuiin hetiang kal chhuak thinte hi University zirlai te an ni a, kum 18-25 inkar an ni deuh ber thin. An kalna senso te, an cham chhunga an ei leh in te - engkim anmahni sum atangin an pe a, Volunteers tam zawk chu hetianga chhuak thei tur hian High School/College kal chungin an lo in tuak tang tang thin a ni.
Kum 2006 atang khan BCM R&D Department nen hian kum tin hetiang ang hun hmang ho tur hian ruahmanna siam a ni a. An cham chhungin thingtlang khua te tlawhin, Mizo inah an thleng a, Mi lovah te fehin chemtum nen thlantui tla bawrh bawrhin hna an thawk thin a ni. Tin, School lamah te pawh kalin naupangte an zirtir bawk a, anmahni talent neih ang ang te mizo naupangte tan an sawr chhuak thin a ni. Anmahni pawhin Zonun zia leh ram chanchin te an zir pah bawk a, Mizoram an tlawha an thil hmuh thate an ram lamah theh darhin pawl pahnih ten kan hlawkpui tawn hle thin a ni.
