May 4, 2014(Pathianni) hi BWA Day a ni a. Thupui atan “An zaa pumkhat an nihna turin” (Johana 17:21) tih thlan a ni a; hei hi Biak in tinah sawi tura ngaih a ni. Thupui hi hetiangin then a ni:
1. Inpumkhat hi Lal Isua duh dan leh tawngtaina a ni.
2. Rawngbawlpuite nên kan inpumkhat a pawimawh.
3. Chhungkuaa inpumkhatna pawimawhzia.
Mizoram Baptist Kohhran hian BWA hi kum 1978 ah kan zawm ve a, tunah hian full member kan ni. Tun hma deuh kha chuan BWA Day hi February thla Pathian Ni hnuhnung berah hman a ni thin a; kum 2005 atang khan May thla Pathian Ni hmasa berah sawn a ni ta a. BCM chuan May thla Pathianni hmasa ber hi Kristian Chhungkaw Ni atan kan lo hman thin avangin hun rei tak chu BWA Day hi a ni tak ni loah kan hmang thin a. Kumin atang chuan khawvel hmun dangte hman rualin BWA Day hi kan hmang dawn ve ta a. Zing inkhawm thawhlawm hi BWA Headquarters “BAPTIST WORLD ALLIANCE 405 N. Washington Street, Falls Church, Virginia. 22046, USA”-ah thawn thin a ni.
Baptist World Alliance (BWA) hi khawvel pumpuia Baptist Kohhran te insuihkhawm a ni a. Kum 1905 khan London khawpui a Exeter Hall-ah din a ni. BWA-ah hian Ram 120 atangin Kohhran hlawm (Convention/Union) 223 kan awm a. Tualchhung Kohhran 177,000 zet leh baptisma chang tawh maktaduai 42 (4,20,00,000) zet kan inzawmkhawm a ni.
John Newton Prestridge-a chuan kum 1904 khan Chanchinbu pakhat ‘The Baptist Argus’ah Khawvel pumpuia Baptist Kohhrante intawhkhawm rawtna a chhuah a; chu thu chu John Howard Shakespeare-a chuan chanchinbu dang ‘The Baptist Times and freeman’ah sawimawi zuina a chhuah ve leh a. Chu thu bawhzui chuan Baptist Union of Great Britain (Sap ram Baptist Inzawmkhawm) chuan October 1904 khan khawvel pumpuia Baptist Kohhran Inkhawmpui (Congress) neih chu an rel thlu ta a. Tichuan London khawpuiah July, 1905 khan Inkhawmpui hmasa ber chu neih a ni ta. Kumin 2014 hi BWA kum 109-na a ni
BWA Din Chhan: Kum 1905 Inkhawmpui chuan Constitution mumal tak a siam ta a. “Khawvel pumpuia Baptist Kohhran zawng zawng hi Pathianin Isua Kristaa a thiltum tipuitling tura rinawm taka thawkho tur leh khawvel pumpui hi Krista ta a nih theih nana thawkho tura BWA hi din a ni.”
BWA hian khawvela chhiatna lo thleng thin- Lirnghing, tuilian, thlipui, tam, indona vanga tuarna hrang hrangah te, rorelna dik lo avanga mipui tuarna leh retheihnaah te, natna leh hri leng avanga tuarnaah te tanpuina hna a thawk thin a. Kum 2012-2013 chhung khan mahni awmna hmun leh ram theuha nasa taka thawk tur leh Khawvel hmun danga kan Baptist unaute nena thawkhoa chutiang kawnga tanpui ngaite tanpui hna thawh te; Ram rethei leh hnufual zawkte tana hmasawnna (development) hna thawh te hi kan hmalakna ki-pui tur a ni a. Lal Isuan “Ka ril a tamin nangnin ei tur mi pe a; ka tui a halin in tur mi pe a; mikhual ka nihin mi thleng a; saruak ka nihin puan mi sintir a; ka dam lohvin mi kan a…Heng ka unau te berte zinga mi pakhat chunga in tih chu ka chunga ti in ni” a tih ang khan mihringte rawngbawlsak hi Pathian rawngbawlna a ni tih hi BWA thupui ber pakhat a ni.
Jerusalem atanga Jeriko khuaa kal tur khualzin pakhat suamhmang tawk, nasa taka sawisak leh thi chhawnga lum reng tawh, mahni in saseng thei tawh lo tanpui ngai Samari mi thain a tanpui ang khan Lal Isuan, “Nang pawh chu ang bawk chuan va ti ve rawh” a tih hi kan beng leh thinlungah ri thar ve leh rawh se.
Kan khawtlang leh thenawmah te, kan Kohhran chhungkua ngeiah te pawh chutianga tanpui ngai leh puih ngaite dap chhuak ila; Puithiam leh Levia chi anga pumpelh tuma hêl leh haider mai lovin Pathian hmingin tanpui leh chhawmdawl hna thawk zel turin inbuatsaih zawk ila. Kan theih tawk a lian emaw, a te emaw mi dang mamawhtute hnena thilpek leh tanpui hna hi eng emaw ti tala thawk theuh turin BWA chuan Kohhran member tin Pathian hmingin min sawm a ni.
