Tunkar Pathiani, May 3, 2015 hi Khawvel puma Baptist Kohhran Inzawmkhawm Pawl - Baptist World Alliance (BWA) Day a ni a. Thupui atan “In laichinna leh thawhhona tha” tih thlan a ni a; Thupui hi Pathian ni chawhma inkhawm leh Pathianni zan Inkhawmah sawi tur a ni a, Headquarters atanga BWA Day puala thu chah chhiar tur buatsaih pawh chhiarchhuah a ni ang. Pathianni zan inkhawmah tawngtai thupui thlan sa hmangin tawngtai rual tur a ni bawk ang. Pathianni Chawhma Inkhawm thawhlawm chu BWA Pual a ni ang a, BCM Headquarters kaltlangin BWA –ah thawn a ni ang.
Tawngtai Rual Thupui : (Zan inkhawma hman tur): 1. BWA hruaitute tan 2. BWA rawngbawlna peng hrang hranga mawhphurhna chelhtu hruaitute tan. 3. BWA thil tum –te tih hlawhtlin a nih zel theih nan. 4. Kohhranhote zingah rawngbawlpuite leh pawl dang mite nen inlaichinna tha leh thawhhona tha kan neih zel theih nan.
Mizoram Baptist Kohhran hian BWA hi kum 1978 ah kan zawmin full member a ni a. Tun hma deuh kha chuan BWA Day hi February thla Pathian Ni hnuhnung berah hman a ni thin a; kum 2005 atang khan May thla Pathian Ni hmasa berah sawn a ni ta a ni.
BWA chanchin tawi
Baptist World Alliance (BWA) hi khawvel pumpuia Baptist Kohhrante insuihkhawmna a ni a, Kum 1905 khan London khawpui Exeter Hall-ah din a ni. John Newton Prestridge (John Newtona) chuan khawvel pumpuia Baptist Kohhranhote intawhkhawmna neih a rawt a. Hei hi John Howard Shakespeare chuan a rawn tuipui bawk a, chu thu chu kal zelin Baptist Union of Great Britain (Sapram Baptist Kohhran inzawm khawm) chuan October 1904 khan khawvel pumpui Baptist Kohhran inkhawmpui (Congress) neih an rel thlu a. Congress thu umzuiin July 1905 khan Londonah BWA chu din a lo ni ta a ni. BWA hi Sap ram khawpui Londonah din a ni nain tunah chuan America khawpui Washingtonah hmunpui (Headquarters) hi dah a ni.
BWA hi khawvel ram hrang hrang 231 chuang zet Baptist Kohhrante inzawmkhawmna a ni a, tunah chuan khawvela Kohhran inzawm khawm pawl lian tak a ni ta a ni. BWA chuan khawvel puma Baptist-te hi Region paruk (6) ah min then a, keini BCM te hi Asia Pacific Baptist Federationah kan awm. Chungte chu- 1. Asia Pacific Baptist Federation (APBF) 2. Europe Baptist Federation (EBF) 3. All African Baptist Fellowship (AABF) 4. North American Baptist Fellowship (NABF) 5. Union of Baptist in Latin America (UBLA) 6. Carribean Baptist Fellowship te an ni.(CBF)
BWA Thil tum Pawimawh Zualte :
BWA chuan rawngbawlna tam tak neiin hma zau taka la mek chungin heng thil pangate hi a ngaih pawimawh zualte an ni. 1. Baptist Kohhranhote inpumkhatna chhawmnun leh thawhhona tha neihtir. 2. Chanchin Tha hrilna (Mission & Evangelism) lama Kohhrante tih nun zel. 3. Chhawmdawlna (Relief), hmasawnna leh a ram mite kohhran hruaitu tha ni tura buatsaih. 4. Pathian duh zawnga dikna leh mimal zalenna humhim leh chi inthliarna do. 5. Khawvel danglam zelah Pathian thudik puan chhuah leh khawvela retheihna tibo tura hmalak
