Tunkar Pathianni May 1, 2016 hi Khawvêl puma Baptist Kohhran Inzawmkhawm Pâwl – Baptist World Alliance (BWA) Day a ni a. Mizoram Baptist Kohhran pawhin he Ni hi urhsûn takin kan hmang leh dawn a ni. Kumin BWA Day Thupui atan “Kristaa Inpumkhatna” ( Ephesi 4:13) tih thlan a ni a; Headquarters atanga BWA Day puala thu chah chhiar tur buatsaih pawh chhiarchhuah a ni ang. Pathianni Chawhma Inkhawm thawhlawm chu BWA Pual a ni ang a, BCM Headquarters kaltlangin BWA Headquarters, Washington, USA-ah thawn a ni ang.  Tawngtai Rual Thupui thlan sa -

1) BWA Hruaitute tan, 

2) BWA rawngbawlna peng hrang hranga mawhphurhna chelhtu hruaitute tan.

3) BWA thil tum te tihlawhtlin a nih zêl theih nan,

4) Kohhran pawl dang mite nen inlaichinna tha zawk kan neih zêl theih nan.

tih te hmangin tawngtai rualna neih tur a ni.

Din tan dan: Baptist World Alliance (BWA) hi khawvêl pumpuia Baptist Kohhran te insuihkhawm a ni a. Kum 1905 khan London khawpui a Exeter (Ekzeter) Hall-ah din a ni.  John Newton Prestridge-a chuan kum 1904 khan Chanchin Bu pakhat ‘The Baptist Argus’ah Khawvêl pumpuia Baptist Kohhrante intawhkhawm rawtna a chhuah a; chu thu chu John Howard Shakespeare-a chuan chanchin bu dang ‘The Baptist Times and freeman’ah sawimawi zuina a chhuah ve leh a. Chu thu bawhzui chuan Baptist Union of Great Britain (Sap ram Baptist  Inzawmkhawm) chuan October 1904 khan khawvêl pumpuia Baptist Kohhran Inkhawmpui (Congres) neih chu an rêl thlu ta a. Tichuan London khawpuiah  July 1905 khan Inkhawmpui hmasa ber chu neih a ni a. Kumin 2016 hi BWA kum 111-na a ni

Din Chhan: Kum 1905 Inkhawmpui chuan Constitution mumal tak a siam ta a. “BWA hi khawvel pumpuia Baptist Kohhran zawng zawng hi Pathianin Isua Kristaa thil engkim fawkkhawm a tum tipuitling tura rinawm taka thawkho tur leh khawvêl pumpui hi Krista ta a nih theih nâna thawkho tura din a ni”.

Special Sunday-a hman tan dan:

Mizoram Baptist Kohhran hian kum 1978 ah kan zawm ve a full member kan ni. Tunhma deuh kha chuan BWA Day hi February thla Pathian Ni hnuhnung berah hman a ni thin a; kum 2005 atang khan May thla Pathian Ni hmasa berah sawn a ni ta a, tun thlengin BWA Day-ah kan hmang ta thin a ni.

BWA Sunday zing Inkhawm thawhlawm hi BWA Headquarters “BAPTIST WORLD ALLIANCE 405 N. Washington St. Falls Church, Virginia. 22,046, USA”-ah kan thawn thin a ni.

BWA-ah hian Ram 121  atangin Kohhran hlâwm (Convention/Union) 232 kan awm a. Tualchhûng Kohhran 177,000 zet leh baptisma chang tawh maktaduai 40 (4,00,00,000) zet kan inzawmkhawm a ni.

BWA hian khawvela chhiatna lo thleng thin- Lirnghing,Tuilian,Thlipui,Tâm, Indona vânga tuarna  hrang hrangah te, Rorêlna dik lo avânga mipui tawrhna leh retheihnaah te, Natna leh Hri lêng avânga tawrhnaah te tanpuina hna a thawk thin a, kumin 2016 chhung hian mahni awmna hmun leh ram theuha nasa taka thawk tûr leh Khawvel hmun danga kan Baptist unaute nena thawkhoa chutiang kawnga tanpui ngaite tanpui hna thawh te; Ram rethei leh hnufual zawkte tana hmasawnna  (development) hna thawh te hi kan hmalakna ki-pui tûr a ni a. Lal Isuan “ka ril a tamin nangnin ei tûr mi pe a; ka tui a hâlin in tûr mi pe a; mikhual ka nihin mi thleng a; saruak ka nihin puan mi sintir a; ka dam lohvin mi kan a…Heng ka unau tê berte zinga mi pakhat chunga in tih chu ka chunga ti in ni” a tih kha. Mihringte rawngbâwlsak hi Pathian râwngbawlna a ni (Service to man is service to God).

Jerusalem atanga Jeriko khuaa kal tûr khualzin pakhat suamhmang tâwk,nasa taka sawisak leh thi chhâwnga lum reng tawh, mahni in saseng thei tawh lo tanpui ngai Samari mithain a tanpui ang khân Lal Isuan, “Nang pawh chu ang bawk chuan va ti ve rawh” a tih hi kan Beng leh Thinlungah ri thar ve leh rawh se.

Kan khawtlâng leh thenawmah te, kan Kohhran chhungkua ngeiah te pawh chutianga tanpui ngai leh puih ngaite dap chhuak ila; Puithiam leh Levia chi anga pumpelh tuma hêl leh haider mai lovin, Pathian hmingin tanpui leh chhawmdâwl hna thawk zêl turin inbuatsaih zâwk ila, Kan theih tâwk a lian emaw, a te emaw, midang mamawhtute hnêna thilpêk leh tanpui hna hi eng emaw ti tala thawk theuh tûrin BWA chuan Kohhran member tin Pathian hmingin min sawm a ni.