Tunkar Pathianni February 7, 2021 hi Khawvêl puma Baptist Kohhran Inzawmkhawm Pâwl – Baptist World Alliance Ni (BWA Day) a ni a, kumin BWA Day thupui atan “Nang malsawmna ni ang che (Genesis 12:3) tih a ni ang.
Kum 1905, July ni 17 khan London khawpuia Exeter Hall ah khawvel pumpuia Baptist Kohhran inzawmkhawm pawl (BWA) hi din a ni a. khawvel ram hrang hrang 126 atangin Baptist Inzawm khawm pawl 241 an awm a, baptisma chang member maktaduai 47 chuang an awm a ni. BCM hi kum 1978 atangin member kan ni ve tan a. Kum 5 dan zela neih Inkhawmpui lian (BWA Congress) ah a remchan dan angin Palai leh Zaipawlte pawh kan tir ve thin a ni.
[caption id="attachment_15684" align="aligncenter" width="474"]
BWA hruaitute[/caption]
BWA Day hi February thla Pathianni hnuhnung berahte, May thla Pathianni hmasa berahte kan lo hmang tawh thin a. Kum 2016 khan BCM Administrative Committee chuan kum tin February thla Pathianni hmasa bera hman turin a rel fel ta a ni. BWA kaltlang hian khawvel pumpui kan hma a. Taksa-a kan thlen vek phak loh hmun tam takah mite tan rawng kan bawl reng a ni tih i hria ang u.
BWA in tihpuitlin a tum langdsar zualte chu:-- Baptist Kohhran hote inpumkhatna chhawm nun zel a, an zingah thawhhona tha neihtir.
- Chanchin tha hrilhna lama Kohhrante tih nun zel.
- Chhawmdawlna leh hmasawnna lama thawh.
- A ram mite Kohhran hruaitu tha ni tura buatsaih.
- Pathian duhzawnga dikna leh mimal zalenna humhim leh, chi inthliarna dodal, human Rights a awm theih nana thawh.
- Khawvel danglam zelah Pathian thudik puanchhuah leh khawvela retheihna tibo tura hmalak, remna leh muanna a awmna tura thawh.
- Thalai leh hmeichhiate rawngbawlna tih chak.
Nikum 2020 kha BWA Congress neih kum a ni a, Rio-de-Jeneiro, Brazil hmuna neih tura reuahman a ni a, covid-19 hrileng avangin a hun sawn a ni a. Kumin 2021 July 7-10 chhung hian biak hmuhtheina (virtual) hmanga neih tura ruahman a ni ta thung a ni. BWA Virtual Congress-a tel duh tan registration hi tih theih reng a ni a, hrechiang duih tan BWA Website www.baptistworld.org ah ngaihven theih a ni.
