April 30, 2017 hi Mizoram Baptist Kohhran Ni pawimawh (Special Sunday) “Buhfaitham Pathianni”a ni a. Hemi pual hian Mizoram pumah Baptist Kohhrante chuan an hmang dâwn a ni. Pathianni Chawhma Inkhawm-ah Headquarters atanga thupui thlan sa 'Pathian chuan hlim taka petu a ni a hmangaih ni' (II Korinth 9:7)  tih hmangin Pathian thuchah ngaihthlak a ni ang a. Headquarters atanga hemi ni pual thuchah buatsaih chu Kohhran tinah chhiar chuah a niin, tawngtai rual thupui buatsaihsa hmangin tawngtairual neih a ni bawk ang. 

Tawngtai rual thupui :

1. Buhfaithâm rawngbâwlnaa hma kan sâwn zêl avângin lâwm thu sawi ni se.
2. Buhfaitham enkawltute leh lakhâwmtute tân thahnemngai taka an thawh theih nân.
3. Chhûng tinten Buhfaithâm rawngbâwlnaah hma kan sâwn zêl theih nân.
4.  Mizoram Baptist Kohhran member zawng zawngten Buhfaithâm hi a hlutzia kan lo hriat a, kan lo ngaih pawimawh deuh deuh theih nân.

..............................................

BUHFAITHAM  PATHIANNI

Buhfaitham tan kum hi F.W.Savidge (Sâp Upa) report-a a lan dân chuan kum 1915-ah an tham tawh a, Presbytery minute-ah chuan kum 1919 hi a lanna hmasa ber niin a sawi.Kum 1973 assembly chuan Buhfaitham rawngbawlna hi a dah tan a, BKHP ten an khawn a, Kohhranin a buaipui thin. Kum 1982 atang phei chuan Assembly-in BHKP kutah mawhphurhna zawng zawng a lo dah ta a. April Pathianni hnuhnung ber hi Buhfaitham Pathianni a hman ani ta ani. Sum tling khawm te chu Tualchhung Kohhran kaltlangin Mission lamah chhun luh thin ani

Kum 1908-ah Khasi rama nu pakhat rilruah chuan chaw chhum apiangin buhfai vei khat lek lekin dah ila, Kristian tinin kan tih chuan nasa takin hna a thawk thei ang tih rinna a lo piang chhuak a. Chutiang chuan a ti ta nghâl a. Rei lotê chhûngin Kohhran pawhin a thatzia an hre ta a. Khasi ram pawh a luanchhuak ta thuai a ni. Chu chu Mizoram hmâr lamin an la chhawng a, chhim lam pawhin kan lo ti ve ta thuai a ni.(Mizoram Baptist Kohhran Chanchin pawimawh lâkkhâwm Part 1 page 36)

Buhfaitham hi a tîr lamah chuan Kohhran sumpuiah hman a ni thîn a. Kum 1919 Presbytery chuan Buhfaitham zînga mi hi hmeichhe Tirhkoh hlawhah hmang ila an tih angin  hman a ni ta a. Hmeichhe tirhkoh an awm loh hnuah sumpuiah a lût leh a, a tûl ang anga hman a ni.Kum 1947-ah Nursery School din a lo ni ta a, zirtîrtute hlawhah hman a ni leh a. Nursery school pawh chu kum 1968-ah a tâwp ta a. Hemi atang hi chuan Z.B.M pualah hman a lo ni ta a ni. Buhfaitham pawisa hi tûn thlengin ramthim rawngbâwlna tangkai tak a ni ta zêl a ni. Assembly-in BKHP-te kuta a dah angin a man zât siam leh a sum lâkkhâwm a tum a, Kohhran-ah a sum chu thehluh nghâl zêl a ni.

Presbytery minute-ah kum 1919 hi a lanna hmasa ber ni mah se pawisa a lang lo va. Kum 1920 atangin pawisa zât târlan a ni. Hetih hun laia pawisa chhiar dân chu chêng-ana-pai (Rs a p)tiha ziak a ni a. Hei hi kum 1952 thlenga hman a ni.Kum 1920-1921 thlenga BCM pumpuia pawisa hmuh zât chu Rs 446 ana 10 pai 9 a ni. Kum 20 hnuah chuan hma kan sâwn ta deuh a, chêng 1,162 ana 11 pai 8 a ni a. Kum 1952 atangin hma kan sâwn ta viau a, chêng sîng chuang fê a ni ta a. Kum 1972-1973-ah chuan Nuai chuang daih a lo ni ta a. Kum 1979-1980- ah chuan maktaduai chuang fe a lo ni leh ta a. Mite thinlungah Pathian ram tûlna a lo lang zêl a. Kum 2016-2017- ah phei chuan Rs 61,170,221.00 a lo tling ta a ni. Kum 26 kalta chhunga BCM-in Buhfaitham-a sum kan hmuh dan a lo tarlang ila:-

Mizoramin Pathian malsâwmna kan dawng nasa hlê a, sum leh pai dehchhuah theihna Pathianin min pe a. Sorkâr hnathawk hlawh a pung chho zêl bawk a. Hêng malsâwmna tam tak kan dawn avâng hian kan thilpêkte pawh a pung zêl a. Missionary tam zâwk tîrchhuak tûr chuan sum tam leh zual a ngai a, Buhfaitham-ah hian chhûng tinten tan kan lâk lehzual chuan Missionary sângkhat kan tîr thei ngei ang.

Pathianin sum leh pai dehchhuah theihna min pe a, min la pe leh zêl dâwn a ni tih ring chungin kan sum leh paite Lalpa tân lâwm chungin i hlân zêl ang u. “Amah atang leh, amah avâng leh amah atân thil zawng zawng a lo awm a ni si a.(Rom 11:36) Tirhkoh Paul’an a tih angin engkim  min petu Lalpa hnênah kan Buhfaitham hi lâwm takin i hlân ang u.

Chhûng tinten he Ramthim rawngbâwlna pawimawh tak hi kan Tu leh Fate hnênah pawh hrilhin tûna Nu leh Pate kan awm tawh loh hnu pawha ngaih pawimawhna tak tak an neih theih nân “Lalpa pual” Buhfaitham Bêl / Bûr i hûng theuh ang u. Rawngbâwla kal chhuak thei lote pawhin mahni inchhûngah hahdam takin Ramthim-ah rawng kan bâwl a ni tih hre thar lehin tan ila sauh sauh ang u#