Tunkar Pathianni, April 26, 2015 hi Mizoram Baptist Kohhran Ni pawimawh (Special Sunday) “Buhfaitham Pathianni”a ni a. Hemi pual hian Mizoram pumah Baptist Kohhrante chuan an hmang dâwn a ni. Pathianni Chawhma Inkhawm-ah Headquarters atanga thupui thlan sa “Pe rawh u, chutichuan pekin in awm ang”(Luka 6:34)  tih thupui hmangin Pathian thuchah ngaihthlak a ni ang a. Headquarters atanga hemi ni pual thuchah buatsaih chu Kohhran tinah chhiar chuah leh Tualchhung Buhfaitham Report  ngaihtlak a ni bawk ang. A hnuaia tarlan thupui hmang hian tawngtairual neih tur a ni:-

i. Lawmthusawina-Buhfaihama hma kan sawn zel avangin ii. Buhfaitham enkawltute & a khawntute tan iii. Buhfaithamah chhung tinten hma kan sawn zel theih nan

 ...................................

Buhfaitham lo chhuah dan:

A lo intan dan hi sawi dan hrang hrang a awm a, amaherawhchu kan kohhranin kan chhui theih danah chuan 1908 ah Khasi nu pakhatin a chaw chum atangin vei khat lek lekin a dah hrang thin a, chumi tlingkhawm chu rawngbawlna tangkai tak a lo ni a, Mizoram Baptist kohhranah pawh 1915 vel daih atang khan mi thahnemngaiten an lo tham ve ta a, 1920 ah chuan Hmeichhe Tirhkohte hlawh atan BCM hmunpui ah a lo lut khawm ta a ni.

A hmanna:

A tirah chuan eng atana hman nge tih hriat chian a ni lova, Pathian ram zauna atan kohhran sumpui ah hman a ni berin a lang. 1920 atangin Hmeichhe Tirhkoh hlawh atan hman a ni a, Hmeichhe Tirhkoh rawih an nih loh hnu khan Thawhlawmpui ah alut leh a, 1947 ah BCM in Nursery School a din khan zirtirtu hlawh atan hman a lo ni leh ta a, 1968 ah BCM in Mizoram pawnah Missionary a tirchhuahk tan a, tichuan Assembly rorelna chuan Missionary chawm nan sum hnar nghet neih tulin a hria a, 1973 atang chuan ZBM tan a lo dah nghet ta a. Vawiin thlengin Mission rawngbawlna atan sum hnar tha tak  a lo ni ta a, Assembly budget chhungah khung tel a ni bawk a ni.

BKHP kuta a awmdan:

Buhfaitham rawngbawlna hi tunhma chuan kohhran kutah a awm a, 1973 atangin Assembly chuan BKHP kutah a dah tan a. BKHP te hian an khawn khawm a, kohhranin a buaipui thin a. Kum 1982 atang chuan buhfaitham mawhphurhna zawng zawng chu BKHP kutah Assembly chuan a lo dah ta a ni. Buhfaitham man chu Tualchhung kohhranah thehluh a ni a, annin Mission lamah an chhunglut leh thin a ni.

Buhfaitham hi rawngbawlna pawimawh tak leh Assembly budget khawih thei a nih avangin chhungkaw tin ten tan i la zêl ang u. Buhfaitham pawimawhzia kan lo hriat a, kan tu leh fa te pawhin an lo ngaih pawimawh zel theih nan theihtawp i chhuah ang u. MBKHP Executive Committee chuan BCM chhungkaw tinin buhfaitham Bel/Bur neih theuh ni se, buhfai pawh tham ngei ni se tiin a rel a, an zinna apiangah uar takin an sawi thin a ni. A tam leh a tlem chu mimal leh chhungkaw thahnemngaihna ang zel ni se. Tin, buhfaitham bela tar/bel tur MBKHP in a siam hi tar/bel ngei ni bawk se a lawmawm hle ang. Tunah chuan ram pumah Buhfaitham khawnna Bu inang kan lo hmang ta a, hmasawnna lawmawm tak a ni. Hei hi FOD Committee buatsaih a ni a, chawlhkar tin khawn a ni , a bu hi Headquarters office ah a thlawnin lak theih a ni.

BCM hian buhfaithamah hma kan sawn nasa êm êm a, Pathian hnenah lawmthu i sawi ang u. Chhungkaw tin te leh a khawntute leh buaipuitute avangin sum tam tak a lo tlingkhawm a, a va ropui em. Lalpa chu fakin awm rawh se. Kum sawmpakhat chhunga buhfaithama kan hmuh dan chu hetiang hi a ni :–

Sl.No.	Kum		Pek zat (in Rupees)
1.	2003-2004	-	9,136,649.65
2.	2004-2005	-	10,856,486.20
3.	2005-2006	-	12,271,707.00
4.	2006-2007	-	12,997,596.00
5.	2007-2008	-	15,007,534.00
6.	2008-2009	-	16,547,534.00
7.	2009-2010	-	18,995,552.00
8.	2010-2011	-	23,444,300.00
9.	2011-2012	-	28,803,599.00
10.	2012-2013	-	34,895,771.00
11.	2013-2014	-	40,739,775.00
12	2014-2015	-	47,586,529.00

2013 – 2014 aia 2014 – 2015 chhunga a punna hi Rs. 6,846,754.00 lai a tling. Heng zawng zawng thawkchhuak thei a min hruaitu Lalpa chu fakin awm sela, ram chhung leh pawn leh khawvel ram hrang hrangah buhfaitham hmanga rawngbawlna ah hma i sawn zel ang u.