Baptist Missionary Society (BMS) World Mission General Director hna hun rei tak lo chelhtu Rev. David Kerrigan chu a rawngbâwlna hna atangin a châwl ve dâwn ta. Ani hi chhûngkuaa Bangladesh, Srilanka lamah rawngbâwlna tanin khawvêl hmun hrang hrangah Chanchin tha hril darh hna thawkin a hun zawng zawng a lo hmang tawh a October 2017 atang chuan a châwl (Retire) dâwn ta a ni.

A aiawh tûr hian Dr. Kang San Tan, Malaysia mi chu ruat a ni. Dr. Kang San Tan hi BMS-ah Executive Director for Asia CMS niin Canada-a awm a ni. Sâp ni lo mah se, BMS chuan Mission lama a hnathawh tawh leh BMS tâna hmathlîr fel tak a neih avângin beiseina sâng tak nên an thlîr mêk a ni. Dr. Tan hian BMS World Mission Director hna hi October 2017 atangin a chelh ve nghal ang.

Dr. Kang San Tan hi 1962-ah Malaysia-ah a piang a, a nupui Loun Ling Lee leh  a fanu Chara nen an khawsa mek a ni. Trinity International University , USA atangin Doctor of Ministry a hmu a, Ph.D hi Theology of Religions subject-ah a zo bawk.