BMS Action Team 2015[/caption]
Missionary Society (BMS), London leh Mizoram Baptist Kohhran hi kawng hrang hrangin kan la thawkho reng a. Tunah hian BMS Action team, member 3 te chu thla ruk zet cham turin November 2, (Thawhtan) khan Lunglei an lo thlengin BCM Guest House Serkawn-ah thlentir an ni a, anmahni a tul apianga hruai (guide) turin Upa Dr. KL.Biakchungnunga, Lecturer, BHSS chu supervisor atan ruat a ni.
BMS Action Team te hian tum 4 lai Mizoram rawn tlawh tawhin BCM hian a lo mikhual thin a. A tlangpuiin kum 18-20 inkar an ni deuh ber thin. High School (Class 12) zir zo, University kal tura an inpuahchah lai hun awl thla 6 vel chhung hi hetiang hian an zirna atan leh an nuna thil tangkai ti turin an in pe thin a ni. Heng ho hi Baptist MIssionary Society -in an kalna tur a ruahman sak thin a, an kalna leh an ei/in mamawh zawng zawng hi anmahni in an in tum vek thin a ni.
An cham chhungin BCM hmalakna hrang hrang te, Mizo Society leh Thingtlang lam chanchin te zirin an kal thin. Institution hrang hrang te an tlawh a, Fahrah enkawlna (Home) te, Recreation Centre te, Addiction Centre te an tlawh a, a chang chuan Lo-ah te an feh a, a changin lui-ah te an kal a, mitthi vuinaah te, Inneih inkhawm-ah te an tel a, khawhar inah te lengin a changin inkhel te an en ve a.. heng zawng zawng hi an tan inzirna tangkai leh rawngbawl zel tura an rilru sawh nghehna hmanrua pawimawh tak a nih avangin BMS hian kum tinin Action Team hi Khawvel ram hrang hrangah Thalai tam tak a tir chhuak thin a ni.
Tun tuma mite hi hmeichhia vek niin University zirlaite an ni a, April 2016-ah an haw leh tur an ni. Team member te chu- 1. Nl. Jessica Outghton, Manchester 2. Nl. Sussanah Greenhelgh, Nothingham 3. Nl. Elizabeth Starr, Leicester City
