Mizorama Chanchin Tha meichher rawn chhitu Baptist Missionary Society (BMS), London leh Mizoram Baptist Kohhran hi kawng hrang hrangin kan la thawkho reng a. Tunah hian BMS Action team, member 4 (tleirawl te te, kum 18 vek) te chuan thla nga chhung cham turin October 13, 2014 (Thawhtan) khan Lunglei an lo thleng.
BMS Action team hi Jubilee Guest House thar, Serkawn-ah thlentir an ni a, anmahni a tul apianga hruai (guide) turin Upa Dr. KL.Biakchungnunga chu supervisor atan ruat a ni. Thla 5 zet an cham dawn avangin an supervisor hian an Mizo hming tur pawh a phuahsak veka hetiangin: Bruce Munroe (Zolianzuala), Mathew Wilmot (Zothantluanga), Lucy Artis (Zodinpuii) leh Sonia Lockton (Zonunmawii) te an ni. Ani hian tun hma lama lo kal tawh te pawh hneh takin a lo kaihruai tawh thin a ni.
BMS Action Team te hian tum 3 lai Mizoram rawn tlawh tawhin BCM hian a lo mikhual thin a. a tlangpuiin kum 18-20 inkar an ni deuh ber thin. High School (Class 12) zir zo, University kal tura an inpuahchah lai hun awl thla 6 vel chhung hi hetiang hian an zirna atan leh an nuna thil tangkai ti turin an in pe thin a ni. Heng ho hi Baptist MIssionary Society -in an kalna tur a ruahman sak thin a, an kalna leh an ei/in mamawh zawng zawng hi anmahni in an in tum vek a ni. An cham chhungin BCM hmalakna hrang hrang te, Mizo Society leh Thingtlang lam chanchin te zirin an kal thin. Institution hrang hrang te an tlawh a, Fahrah enkawlna (Home) te, Recreation Centre te, Addiction Centre te an tlawh a, a chang chuan Lo-ah te an feh a, a changin lui-ah te an kal a, mitthi vuinaah te, Inneih inkhawm-ah te an tel a, khawhar inah te lengin a changin inkhel te an en ve a.. heng zawng zawng hi an tan inzirna tangkai leh rawngbawl zel tura an rilru sawh nghehna hmanrua pawimawh tak a nih avangin BMS hian kum tinin Action Team hi Khawvel ram hrang hrangah Thalai tam tak a tir chhuak thin a ni.
