May 4, 2018 (Zirtawpni) hi Baptist Kohhran Mipa Pawl (BMP) Din champha phak vawi 38-na, (38th BMP Day) a ni a. Mizoram pumah BMP ten he Ni pual hian Progamme siamin urhsun takin an hmang ang. Kuminah BMP Day hi Sawrkar Chawlh a nih loh avangin chhun lama programme hmang thei lote pawhin zingkarah hnatlang te neiin, zan lamah Inkhawm Programme urhsun takin an hmang dawn a ni.

 

Kumin BMP Day thupui atan “Lalpa Krista rawng in bawl a nih hi,” ( Kolossa 3: 24)  tih hman a ni ang a. Headquarters atang Thuchah leh Bible chang chhiarchhuah tur buatsaih chu chhiar a ni ang. Heng bak chu Unit ten anmahni duhdan leh ramchan angin Programme an siam belh thei ang.

..........

Baptist Mipa Pawl chanchin tlangpui

Baptist Mipa Pawl (BMP) hi Thingsaiah May 4, 1980 khan din tan a ni. Chutih lai chuan a hming hi sâp tawngin “Baptist Men’s Fellowship” tih a ni a, a lam a har deuh avangin 1983-ah “Baptist Mipa Pawl” tia thlak a ni. BCM Assembly 1988 chuan BMP hi Kohhran hnuaia Fellowship pakhat ni turin a lo pawm ta a, chuta tang chuan Tualchhung Kohhran hrang hrangah din phal a ni ta bawk a. Assembly chuan BMP Inkaihhruaina Dan ruahman chu a pawm nghal bawk a ni. BCM Assembly 2006 chuan BMP din ni atan Thingsaia a din tan hun 4 May 1980 chu BMP Day atan a pawm a, chuta tang chuan kum tinin BMP Day hi hman thin a ni ta a ni. BCM Assembly 2011 chuan BMP chu Tualchhung Kohhran bakah Pastor Bial tina din a lo phalsak leh ta zel a, tichuan Pastor Bial tam takah din a lo ni ta zel a, a lawmawm hle. Tunah chuan hmun tam takah Bial BMP Inkhawmpui leh rorelte pawh neih thin a lo ni ta bawk. 2017 BCM Statistics a kan hmuh angin tunah hian BMP member hi 114765 an awm mek a ni. BMP Din chhan: Baptist Mipa Pawl hian dihchhan leh thiltum mumal tak a nei a, chungte chu :- 1) Baptist mipate thlarau nun buatsaih leh tihchak. 2) Kristian chhungkaw din. 3) Kohhran tana kutke tangkai nih. 4) Khawtlang thatna tura thawh. BMP Thuvawn. BMP chuan thuvawn a nei a, hetiangin: “ Kei leh ka chhungte erawh hi zawngin Lalpa rawng a nia kan bawl dawn ni”. (Josua 24 : 15b).   Related Pages: * BMP Day *BMP History