May 2, 2013:
Baptist Kohhran Hmeichhe Pawl(BKHP) chuan May 2, 2013(Ningani) hian an din champha phak vawi 75-na (Platinum Jubilee) chu Unit hrang hrangah ropui takin an lawm mek a. Unit tam takin ruai nen an lawm dawn a ni. Hemi Ni hian BKHP awmna Unit tinin Jubilee lawmna Inkhawm leh Lungphun hawnna neiin zan lamah MBKHP in programme a ruahman angin Inkhawm dkhan Unit hrang hrangah chuan anmahni hmun theuhah Jubilee lawmna programme an buatsaih a. Kan hriat theih chinah MBKHP hruaitute pawhin heng Unit-ah te hian hun an hmanpui:
PS. Lalhmingthangi, Organiser : Luangmual Unit-ah Dr. Chawngthanpari, Asst.Secy. : Serkawn Unit H. Lalkimi, Treasurer: Gilgal Unit, Theiriat, Pi Zosangi, Finance Secy.: Mualthuam North Unit, B. Singpari, Commt. member: Zotlang North UnitBKHP Din chhoh dan:
Kum 1938 March thla khan, Missionary Pi Zirtiri hovin Assembly hriatpuiin Girls Auxiliary (G.A) hi Serkawnah din a ni a. Thuvawn (motto) atan “Ka Lalpain tih tura mi ruatsak apiang chu ti turin ka inpeih reng e” tih chu hman a ni. GA hruaitute leh mi thahnemngaite thingtlangah zinchhuakin thil awmzia an sawifiah zel a, G.A din duhte chu Branch an dinpui zel s. Kum 1945 ah chuan khaw 35 ah G.A Branch a lo ding thei ta a ni. Khawtlangah damlo leh chhungkaw tanpui ngaite tanpui chu an tum ber pakhat a ni a, kohhranah pawh a tul ang zelin tanpuina hna an thawk thin a. Inkhawmna hun pawh an hmang thin. He pawl hian Nula chauh a huam a ni.
Kum 1947 ah Nu Pawl a lo ding ve leh a. Nu pawl chuan anmahni puala inkhawmnate neiin rawngbawlna kawng hrang hrang ah hman an la chho ve leh a. An hlim hle. Chutianga Baptist hmeichhiate pawl hnih anga awm a, a hranga inkhawm leh rawngbawlna kawng hrang hranga hman an han la chho ta chu BCM Assembly hotuten fel tawk lovin an hre a a., Nula pawl (G.A) leh Nu pawl chu pawl khata inzawmkhawm dan tur an ruahman ta a. Kum 1965 March 20 khan BCM Assembly hruaitute ruahmanpuinain Baptist Kohhran Hmeichhe Pawl (BKHP) chu a lo ding ta a ni. He pawl hian Nu leh Nula, Baptist kohhrana hmeichhia zawng zawng a huam ta vek a ni. Kum 14 chin chunglam zawng zawng, Hmeichhia a duh apiang, member nih theih a ni.
