Karleh Thawhtanni, May 2, 2016 khi Baptist Kohhran Hmeiche Pawl (BKHP) Day a ni a. Mizoram pumah BKHP ten urhsun takin an hmang ang. Kumin BKHP Day thupui atan “Thlen chin atanga hmasâwn” (Philipi 3:16) tih hman a ni ang a, zan lam inkhawm -ah hian Headquarters atanga tawngtai thupui siam sa hmangin tawngtairual a ni ang a, inkhawm thawhlawm hi Bial kaltlangin MBKHP-ah thehluh tur a ni ang.
Tawngtai thupui (Subject) 1. MBKHP Hruaitute, Bial hruaitute leh Unit hruaitute tân 2. Chhawmdâwlna In leh Drop-in Centre-a thawktute tân 3. Chhawmdâwlna In leh Drop-in Centre-a enkawl mêkte tân
Baptist Missionary Society (BMS) atanga Mizorama Missionary lo kal te zîngah hmeichhe Missionary engemaw zât an awm a, chûng zînga pakhat Pi Zirtîri (EM Chapman) hovin Asssembly hriatpuina leh kaihhruainain kum 1938 khân “Kristian Nu Pâwl” (GA - Girls Auxiliary) din a ni a. Sâp rama GA te thuvawn “Ka Lalpain ti tûra mi ruatsak apiang chu ti tûrin ka inpeih reng e” tih chu thuvawn atân an hmang nghâl a. GA hian Nula chauh a huap avângin kum 1947-ah nu thahnemngaite chuan Nu Pâwl an lo din ve ta a.
Chutianga hmeichhe zîngah pâwl pahnih awm ta chu Mizoram Baptist Kohhran hruaitute chuan fel tâwk lovin an hria a, Nu pâwl leh Hmeichhe pâwl (GA) chu pâwl khatah zawmkhâwmin Baptist Kohhran Hmeichhe Pâwl (BKHP) a lo din ta a ni. 20th March 1965 khân Assembly hriatpuiin BKHP chu a lo ding ta a ni. GA Din atangin a kum zât pawh chhiar ni se ti-a Assembly in a rel angin 1938 chu BKHP din kum atan pawm a lo ni ta a.. Kum 2013 khân a kum 75-na ‘Platinum Jubilee’ a hmang tawh nghe nghe a ni.
BCM Statistics 2015-2016-in a tarlan danin tunah hian BKHP member 32489 an awm mek a ni.
