2016 Assemly Hnahthial-a rêl a nih angin kumin atangin Pastor Bial Inkhâwmpui chu October Pathianni vawi hnihna hmangin ram pumah a ruala neih a ni a, tluang takin zawh a ni ta. Pastor Bial thenkhat chuan Assemly-in hun in anga hman tûra rêl hmaa lo inkhâwmpui emaw rorêlna lo nei tawh an awm a, Bial thenkhat chuan inkhâwmpui nei lovin ni khat rorêlna nei bial pawh an awm bawk a ni.Bial inkhâwmpui nei report kan dawn hi Pastor Bial 46 an ni a, bial 34 atangin kan dawng lo a ni. Bial Inkhâwmpui Thupui langsâr zual te chu; 'Kristian Nun' tih hi bial 11-in an hmang a, 'I ram lo thleng rawh se' tih leh 'Kohhran' tih thupui hmangin bial 6-in Inkhawmpui an hmang bawk a ni.
Mizoram Baptist Kohhran Rorelna pawimawh tak - Pastor Bial Rorelna hian Kohhran kalphung leh hmasawnna tura rawtna an neihte ngaihtuahin chu chu Area Baptist Council (ABC) Rorelnaa ngaihtuah turin a chhawp chhuak thin a, ABC rorelna-in a passed chuan BCM Assembly-ah ngaihtuah turin a thlen chho leh thin a ni. Kuminah pawh Pastor Bial hrang hrang atangin ABC-Assembly thleng chho tur Agenda engngemawzat a awm leh dawn a ni.
(Kar hmasa khan Pathianni vawithumna hmanga Inkhawmpui nei leh tur engngemawzat awm anga tarlan kha hriatsual palh vang a ni e.. - Admin)
