Tunkar Thawhtanni, February 8, 2021 khan Baptist Higher Secondary School, Serkawn-in kum 60 a tlin Champhaphak (Diamond Jubilee) hriatrengna lungphun (monument) chu BCM General Secretary, Rev. F. Ramdinmawia’n a hawng. He Diamond Jubilee lawmna programme tawi buatsaih hi BCM Hruaitu pawimawh tak tak te leh Planning Commission member ten an telpui a ni.
Lungphun hawnna inkhawm tawi hi chawhnu dar 1:00 ah tan niin BHSS Principal, Pu R. Zosangliana’n a kaihruai a. Rev.L. Vanlalsanga, Education Director, BCM –in Pathian hnena inkawltirna hunserh hmangin Pu R. Vanlalthiana, Secretary, Diamond Jubilee Celebration Committee-in Report tawi leh ngaihnawm taka a pek hnu-ah Rev. F. Ramdinmawia, General Secretary, BCM-in Monument hawngin thuchah tawi a sawi nghal bawk.
Baptist Higher Secondary School, Serkawn hi kum 1961, February 8 khan ‘Serkawn Kristian High School’ tiin din a ni a. Kum 1974-ah BCM Assembly chuan ‘Kristian High Schoool, Serkawn tiin a hming a thlak a. Kum 1985-ah Mizoram Sorkar-in Deficit Status-ah awmin, kum 1.7.1996-ah Higher Secondary-ah hlan kai a lo ni leh ta a ni. Higher Secondary a hlan kai a lo nih tak hnu hian BCM Assembly 1997 chuan "Baptist Higher Secondary School, Serkawn" ti-a ni se ti-a a rel angin 1997, April atangin Official-in he hming hi hman a lo ni ta ni.
Kum 2006 ah BCM Education Department ruahmanna-in Baptist English School tih thin chu Baptist Higher Secondary School, Junior Section tiin thlak a ni a, BHSS nen a suihzawm veleh ta a. Tunah chuan Nursery atanga Class XII thleng zir theihna niin, Mipa leh Hmeichhe Hostel changtlung tak a nei nghal bawk.
Tun dinhmuna School naupang hi High School leh Higher Secondary chinah sang khat vel zet neiin, Junior Section (Nursery – Class VIII) lamah zirlai sang khat vel zet an awm bawk a ni.
