March 3,2020 (Thawhlehni) khan Baptist Higher Secondary school Junior Section te chuan BCM Nau hnuchham enkawlna - Baptist Church Orphanage(BCO) tanpui nan School show neiin Mizo thawnthu lar “Liandova te unau” tih chu Saikuti Hall Lungleiah lemchanin an entir.
He School show hi chhun lam leh zan lamah neih a ni a, Saikuti Hall khatin mipui an kal khawm a, zan lamah phei chuan ticket changlo engemawzat an awm a ni.
Junior Section Vice Principal, Upa ZD Lalnunmawia’n lawmthusawina leh school show buatsaih a nih dan te a sawi a, Rev. L. Vanlalsanga, BCM Education Director-in programme te Pathian hnenah hlanin a tawngtai a, Rev. R. Lalbiakliana – AGS Service in he Show-a an sum hmuh cheng nuai khat zet BCO tanpui nan Upa MS Dawngliana, BCO Manager hnenah a hlan nghal a ni.
He Mizo folktale Musical play hi miin an hlutin a entute rilru a khawih hle a. A thawnthu ah hian fahrah rethei leh chanhai Pathian in a ensan lohzia te, taimakna, dawhtheihna leh tumruhna hi a tawpah chuan a din chang leh thin a ni tihte chiang taka tarlan a ni.
Te Unau play-ah hian a thawnthu mil, anmahni school kutchhuak hla thar 8 lai zep telin a satute pawh School naupang vek an ni a; Thawnthu, lemchan, zai leh lâm te mawi takin a inrem chhuak vek a ni. He lem chan hmuhnawm leh zirtir nei tha tak hi Nl. Lalruatkimi (D/O Evan Lalhuliana Chhangte) Hyderabad University atanga Master of Performing Arts zirchhuak leh BHSS (Junior Section) zirtirtu te thawh hona a buatsaih a ni.
He Show hi BCM hruaitute pawhin a ngaihlut sak hle a, General Secretary hovin BCM hruaitu pawimawh tak takin an tawiawm a ni.
