TKP Shalom Unit, Aizawl[/caption]
Vawiin, July 30, 2015 (Ningani) hi Thalai Kristian pawl(TKP) din champha vawi 64-na a ni a. Unit tam zawk chuan tukin zing lamah Social Service neiin, thinghpun hnatlang te, thingphun nun tawh sa hung that leh tihfai te, khawlai bawlhhlawh chhar fai leh, Biak In leh a vel tihfai hnatlang an thawk a ni.
Hetihlai hian Hnahthial Bazar Unit chuan TKP Day Pual hian Hnahthial dam dawiin-ah Poor fund (Damlo harsa zualte tanpuina) Rs. 10250 an hlan. Kolosib Unit chuan TKP Day Pual hian Thisen unit 31, Kolasib Hoispital-ah an pe bawk. Unit thenkhat chuan chhun lamah infiamna intihlimna programme an siam bawk.
[caption id="attachment_7148" align="aligncenter" width="194"] TKP Kanaan Unit, Aizawl[/caption] |
[caption id="attachment_7150" align="aligncenter" width="156"] Bethlehem unit, Aizawl[/caption] |
[caption id="attachment_7151" align="alignright" width="193"] TKP Vaivakawn Unit[/caption] |
Zanin-inah MTKP Headquarters atanga Inkhawm Progamme kaihhruaina siam sa angin TKP Day pualin Unit tinah Inkhawm a ni ang. TKP Din tanna, Serkawn Unit chuan zanin atangin TKP Day pual hian Upa KL Biakchungnunga Speaker-a hmangin Crusade an buatsaih thung. chu Speaker a ni aMTKP chuan Kum dang ang bawkin TKP Day hi Kohhran leh khawtlangin a hlawkpui theih nana hman tum theuh tur leh Social Service pawh neih ngei tum tur te, Unit tinin TKP Day pual Inkhawm buatsaihin, programme pawh uluk leh tha taka duang turin a chah a ni.
Kumin TKP Day thupui chu ‘Nang malsawmna ni ang che’ (Gen 12:2) tih a ni a. Inkhawm thawhlawm awmin chu chu Bial kal tlangin MTKP Headquarters-ah thehluh tur a ni ang.
--------------------
TKP tobul & TKP Day :
Hun enge maw chen kohhrana thalaite puala rawngbawlna huang hran siam tura uluk leh fimkhur taka an ngaihtuah hnuah July 30, 1951 khan Serkawn-a Thalai rualte leh Kohhran Upate chuan kan Zosap Missionary-te duhsakna leh kaihhruaina hnuaiah Thalai Kristian Pawl hi an lo din a.
Hruaitu hmasa te chu :- President – Pu Lungruala; Vice President – Pu Vanlalkunga; General Secretary – Pu K.Lalliana; Treasurer – Pu T.Ropianga;
Senior Adviser – 1) Rev H.S.Luaia; 2) Upa C.Saizawna; 3) Zomawia Nu (Mrs FJ.Raper) 4) Pu Lalmama te an ni a.
Executive Committee member te chu:- Nl Rothuami; Pu Hrangthanga; Pu Lalsawma; Pu Remkunga leh Pu Thanghmuna te an ni.
Thalai Pawl din hi Presbytery (tunah BCM Assembly kan ti) in a lo phalsa tawh avangin 1952 Presbytery inkhawmpui (Pukpui) chuan Thalai Kristian Pawl lo ding ta chu a pawmpui nghal ta bawk a. TKP hi Presbytery hian Biala din phalna a pek nghal bawk avangin bial hrang hrangah pawh TKP hi din nghal a ni.
Hetih lai hian Mizoram hi Assam state chhunga district pakhat mai a nih avangin Zoram huapa TKP inkhaikhawmna pawh District TKP tih a ni a, District TKP inkhawmpui hmasa ber pawh 1955 khan Pukpui-ah neih a ni. Hun rei tak chhung chu TKP Day atan hian District TKP inkhawmpui hmasa bera (1955) a ni hmasa zawk, October 22 chu hman a ni thin a. Amaherawh chu he ni hi dik tawk lova hriatna a awm avangin MTKP Rorelna chuan vawi hnih thum lai a ngaihtuah hnuin 1995 MTKP Rorelna (Sethlun) chuan Kohhran hruaitute leh kan missionary-te kaihhruaina hnuaia Serkawna TKP an din ni, July 30 hi TKP Day-ah hman ni tawh se a ti a, chu chu BCM General Committee pawhin a pawmpui tak avangin 1997 atang chuan TKP Day hi July 30-ah hman a lo ni ta a ni.
TKP Rawngbawlna tlangpuite:
1. Mission :
TKP hian a din tirh atangin thlarau bo veina lian tak neiin, District TKP inkhawmpui hmasa ber 1955-a Pukpuia neihah pawh Agenda “TKP hminga Thuhriltu tirh” tih ngaihtuah nghal a ni a. Vawiin thleng hian TKP te hian theih tawkin hma kan la la ve zel a ni. 2013-2014 chhung khan TKP Bial 68 leh Unit 209 in Mission Support an pe a, Mission Support pe hi kan la pung zel a. Hemi kum chhung tho hian MTKP chuan Mission Support Rs 135000.00 a pe bawk a, MTKP hian missionary damlo leh tanpui ngaite tanpui nan Mission Relief a sem ve thin bawk a. Heng bakah hian MTKP, bial leh unit ten Mission lama hma kan sawn theih nan thuzir tur te buatsaihin, mission consultation te neiin, work camp leh mission visit te neih thin a ni bawk.
2. Kohhran leh TKP :
‘Krista leh Kohhran tan’ ti-a thupui kan dah angin TKP hian Kohhran tana a tangkai thei ang bera awm hi a tum fo thin. BCM project hrang hrang te chu MTKP chuan thalai te project-ah pawmin a hlawhtlin theih nan theihtawp a chhuah thin a. Tun hnai maiah pawh AICS leh HATIM tan te, Christian Hospital Lawngtlai leh Serkawn tan te, Nauhnuchham (BCO) enkawlna atan te pawisa faia a tanpui bakah hnatlang leh thil dangtein a tanpui thin a. Kohhran thlarau lam nun hmasawnna atan crusade, camping, discipleship / leadership / counseling training te buatsaihin, zaipawl hmasawnna atan pawh solfa camp leh zaipawl intawhkhawmna te buatsaihin hma nasa takin a la thin bawk.
3. Khawtlang thatna tura hmalak :
TKP hian khawtlang thatna turin kawng hrang hrangin hma a la thin a. Zirna lam te, khawtlang fai leh thianghlimna thu te, environment humhalh thu te, zu leh ruihhlo do chungchang te, HIV/AIDS chungchanga inzirtirna te, a thlawna thisen pek chungchangah te hma a la thin a. Kristian chhungkaw din chungchang te, ngaihhlut tur dik inzirtirna te, intodelh tura inzirtirna te pawh neih a ni. Heng hmalakna hrang hrangah hian sorkar leh tlawmngai pawl hrang hrangte bakah kohhran pawl dang thalai te nen pawh hmalakho thin a ni.
4. Thalai Pawl dangte nena thawhhona :
District TKP inkhawmpui hmasa ber (1955) chuan kohhran pawl dang thalai te nena thawhhona leh rampawn thleng pawha huang zauh a tul thu a lo ngaihtuah tawh a. Vawiin thlengin TKP te hian Mizoram chhungah leh kan state thenawmah te leh hmun hla zawk thleng pawhin palaina leh rawngbawlna a la nei zel a ni. North East India Christian Council Youth Assembly-ah a hnarkaitu te zinga mi kan ni a, Baptist Youth Fellowship India-ah pawh chanvo pawimawh tak tak changin, National Council of Churches in India Commission on Youth (NCCI CoY)-ah te pawh kan tel ve ta a. Asia Pacific Baptist Youth Fellowship leh Baptist Youth World Conference-ah te pawh zaipawl leh palai kan intir ve reng thin a ni.
5. Thalai Entu :
TKP ten ziaka rawngbawlna hlu tak kan neih Thalai Entu hi 1978 atanga chhuah tan a ni a, tunah hian thla khatah copy 11700 sem chhuah mek a ni. Thalai Entu hi Pathian thua infuih thar nan te, chanchin inhriat tawn nante, rawngbawlna report tarlan nan te leh thalaite tana thu bengvar thlak tak tak inhrilh hriat nan te hman a ni thin a. TKP te rawngbawlna pawimawh tak a ni. Tun hnaiah hian Pathian malsawmna leh thawktute thahnemngaihna azarah kan semchhuah zat pawh a pung nasa ve hle a ni
6. Inchhiarna : (Src: BCM Statistical Handbook, 2014-2015)
Mizoram Thalai Kristian Pawl hnuaiah hian Pastor bial 79-ah Unit 458 awmin, Member hmeichhia – 15656 leh mipa – 26498 niin an zavaiin member 4254 an ni. 2014-2015 chhungin dan puitlinga nupui pasal nei tuak 424 an awm a, Dante-a nupui pasal nei tuak 319 an awm bawk.
