Nimin, March ni 2, 2021 (Thawhlehni)ย khan BCM Puipa te leh Assembly 2021 thlengtu tur Ramthar, Lunglei Kohhran hruaitute leh Bial Puipa ten inkawmhona neiin, March ni 10-14, 2021 chhunga BCM Assembly neih tur chungchang an thlir ho.
He inkawmkhawmna hi Rev. F. Ramdinmawia General Secretary a kaihruai a, a thlengtu tur inbuatsaihna hrang hrang te leh palai (mikhual) lo dawnsawn dan tur ruahmanna te an thlirho a ni.
General Secretary in a tarlan dan in kum in Assembly hi hrileng avanga kum dang ang a neih theih a nih dawn loh avangin , Sawrkar atanga phalna pek zul zui in Palai (mikhual) kalkhawm tur pawh palai thin zatve mi 500 atanga 550 ruahman a ni a. Vantlang inkhawm leh zing Bible Study te neih theih a nih dawnloh thu te, Pathianni zing ah Pastor Nemnghehna (Ordination) Inkhawm leh chawhnu ah Lalpa Zanriah Inkhawm chauh neih a nih tur thu leh heng inkhawmah te pawh zaihona leh Zaipawl neih a nih dawn loh thu tarlan a ni bawk. Assembly thlengtu lam pawhin an ruahmanna te tarlang in sub-committee hrang hrang 10 an awm thu leh an inbuatsaihna pawh an inpeih tawh thu te an tarlang.
Heng sub-committee ah hian kan boruak tawn mek avanga Health & Medical Sub-Committee an ngaihpawimawh thu leh ruahmanna pawh felfai thei ang ber a an siam thu te, Palai lo dawnsawnna tur counter tin ah Screening point an buatsaih nghal zel thu te, Rorel palai thut dan tur leh lo dawnsawn dan tur pawh Sawrkar in dan (SOP) a zam zulzuia felfai taka neih a nih tur thu leh rorelna-a tel tur te nitin screening lo tih zel a nih tur thu te tarlan a ni.
Tun tum Assembly hi a vawi 125-na niin thupui โI Pathian tawk turin inpeih rawhโ tih hman a ni dawn a, Assembly-a ngaihtuah tur agenda pangngai bak ah BCM Planning Commission 2020 in kum 10 chhung BCM kal dan tur ruahmanna (planning) a siam hrang hrang te pawm tura ngaihtuah a ni dawn a ni.
