Mizoram Baptist Kohhran Rorelna Sang ber, BCM Assembly Farmveng-a neih mek chu Rorel Nikhatna hun hmasa lamah President inthlakin, President kal chhuak tur, Rev. H. Sangchema chuan President Elect Rev.C.Ngurhnema chu BCM Presidentnihna hlanin Rorelna thutthleng a hlan a. Kum 2015-2016 atan BCM President thar a ni ta.

Rev. C. Ngurhnema Chanchin tlangpui

Zirna lam leh eizawnna :

1956-1960 - Primary School, Lungmawi.

1961-1962 - Class IV-V., Hmuntlâng Govt. M.E.S.

1963 - Class VI., KKP Private Middle School.

1867 - Class VII., Hnahthial Private H/S

1968 - Class VIII., Pângzâwl Private H/S.

1969 - Class X., Coaching Class, Aizâwl.

1970-1971 - Class X., (Regular) Hnahthial H/S.

1971-1972 - PUC, Lunglei College.

1972-1975 - BA., Lunglei College.

Lungmawi-a an awm laiin an khuaah Middle School a awm loh vangin, Hmuntlângah Class IV & V a zo. Pângzâwla an pem kumah Khawngbâwk, Khuanghlûm leh Pângzâwl khaw tangrualin Private Middle School an din a, chu chu KKP Middle School tih a ni. Chutatang chuan Class VI a zo.

1964 & 1965 ah lo neiin chhûngte a pui a, 1966-ah pawh thlawhhma an lâk leh mêk laiin chapchârah Mizoram a buai ta a, underground a zawm ve. 1967-ah sipaiin an man a, Lunglei Temporary Jail-ah thla khat a tan hnuin chhuah a ni a, Hnahthialah chhung-leh-khatte khawngaihnain July thla chawhnu lamah Class VII a zawm a, tha takin a zo va. 1968 kumah Pangzawl-ah Private Junior High School din a ni a, chutah chuan Class VIII a zo leh.

1969 kumah Aizâwl-ah mi ina awmin zîng School-ah Class X a zawm a, HSLC chu a pass zo ta lo va, 1970 September thla-ah Hnahthial High School-ah a zir chhunzawm leh a, 1971 kumah a passed ta a. Hemi kum vek hian Lunglei College-ah mahni khaw lama hlo thlo pahin PUC a zir a, 1972-ah a zo.

1972 kum-ah Pângzâwl Private High School-ah zirtîrtu hna a zawm a, he hna thawk chung hian Lunglei College-ah a zir zawm zêl a, 1975 kumah BA a passed. Zirtîrtu hna hi 1982 May thla thlengin a thawk zui.

Khawtlâng tâna inhmannate:

1964-1966 - Secretary, Young People Society (YPS), Pangzawl. Ram buai vangin a khaihlak.

1968 - Secretary, YPS; Pângzâwl.

1973 - President, YPS, Pângzâwl.

Khaw mal pâwl bîk zawmpui nei lova awm reng ai chuan Zoram huap pawl YMA-a inleh tha zâwka an hriat avângin ama ho hian YPS chu Young Mizo Association (YMA)-ah leh a ni. YMA Hqrs. Aizâwl an zawm nghâl mai lo nain, chhim lamah YMA Branch hmasa ber a ni. 1973 kum vek hian Pângzâwl khaw pum pui huapin ‘Branch’ din a ni ta.

1973-1974 - Secretary, Pangzawl Branch YMA.

1974-1978 - President, Pangzawl Branch YMA.

1974-1977 - Secretary, Games & Sports Association, Pângzâwl Grouping Centre.

1974-1981 - Secretary, Pângzâwl Teachers’ Union

Pastor nih hmaa a rawngbâwlna te:

Pianthar hmain Pângzâwl kohhranah 1972-1974 chhung zaipawl conductor hna a chelh a, KNP zirtîrtu hna pawh kum khat a thawk. Bial TKP Asst. Secretary hna reilo te a chelh. January 26, 1977 kumah a piang thar. Hetih lai hian Khuanghlûm Kohhranah an lawi tawh a, 1980 kumah Rawngbâwltu-ah lâk a ni a, Rawngbâwltu-a lâk anih rual hian Kohhran Secretary atân thlan a ni. Zai lam hi a tuina a nih avângin a pian thar hnuah pawh Khuanghlûm Kohhran Zaipâwl Conductor-ah kum 2 chhûng a tang.

1981 kum Shillong-ah MA a zir a, ZPMBK TKP President-ah thlan a ni. Fulltime-a rawngbâwl tûra kohna a dawn tâk avângin a thawk zui hman ta meuh lo. An khuaah kir leh rihin, Rawngbâwltu hna te, High School-a zirtîrtu hna te a chhun zawm lailâwk leh a, 1982 June thla-ah B.D zirin a kalsan ta a ni.

Pathian Thu (Theology) zirna:

1982-1985 - B.D., UBS, Yavatmal & Pune. 1983 kum chanve hnu lamah UBS hi Pune-ah ansawn a, Pune atangin 1985-ah B.D a zo.

1998- 2000 - M.Th., UTC, Bangalore.

Pastor nih hnua a rawngbawlnate:

1985-1986 - Pro. Pastor, Phawngpui Bial, Bualpui (Ng)

1986-1987 - Pro.Pastor, Pangzawl Bial, Serchhip.

5. 3. 1987 - Serkawn Assembly-ah Rev. Dr. CL.Hminga’n Minister atan a ordain.

1987-1991 - Bialtu Pastor, Pângzâwl Bial, Pzl.

1991-1993 - Bialtu Pastor, Khawruhlian Bial.

1993-1998 - Mission Field Director, Karbi Anglong Field.

2000-2001 -

2001-2002 - Academic Dean, AICS

2004-2004 - Bialtu Pastor, Aizâwl ‘E’ Bial.

2004-2007 - Executive Secretary, Aizâwl Area

2007-2010 - Co-ordinator, Pastoral Department

2010-2013 - AGS, Service.

2013-2014 - Dean, JBS

2014-BCM President Elect

A hna pangngai baka rawngbawlna a chelhte:

1. Pastor Rev. Lâwmsânga, Aizâwl East Bialtu chu a boral thut avângin AICS-a thawk chungin January 2002 atangin a bial hi a hmui. April 2002 atangin Bialtu Pastor atân dah zui a ni a, AICS ah parttime-in 2004 Academic Session zawh thlengin a zirtîr zui.

3. Aizâwl-ah Executive Secretary hna a thawh chhûngin Mizoram Kohhran Hruaitute Committee (MKHC) Secretary hna te, Bible Society of India, Aizâwl Auxilliary-ah Hon. Treasuer hna te leh The Leprosy Mission-ah Vice President hna te a chelh.

4. Bangalore-a a zir laiin Bangalore Mizo Christian Fellowship (BMCF) ah Vice President hna a chelh.

5. Kum 2001-2005 chhung Mizo Theological Association Secretary hna a thawk.

Training leh palaia a kalna te:

BCM aiawhin Palaina leh Training/Seminar chi hrang hrangah a tel ve nual tawh. India ram pawnah pawh Pathian leh Kohhrante duhsakna azarah 2005-ah Jonathan (Mission) Training, Chiangmai, (Thailand) ah leh 2010 kumah 20th. BWA Congress, Honolulu, Hawaii (USA) ah te a kal ve tawh.

Lehkhabu ziakte:

1. Inthawina Nung- (2001 Beirual Thuzir, mi dangte nena inziak awm).

2. Kristian Chhungkaw Thuzir- 2007.

3. Exodus Bung 1-19 (2011 S.S Senior B Zirlaibu).

4. Exodus Bung 20-40 (2012 SS Senior B Zirlaibu)

5. BCM Pastor Directory -2008 & 2009. (Compiled)

6. BCM Statistical Handbook - 2007, 2008, 2009 (Compiled)

BCM Ni pawimawh bu leh Kohhran Chanchinbua- a chhuah tur article chi hrang hrang leh seminar paper tlema zawng a ziak ve tawh.

Pângzâwl Pastor Bial a enkawl laiin – 1988 kum tawp lamah Mizorama Harhna lo thleng chuan Pathian khawngaihna avângin, thlarau lam nunah malsâwmna nasa tak a dawntir a, thlarau nunah thil tam tak a hriat phah a ni. Hemi hnu lamah hian Salvation Camping leh Revival Crusade neiin hmun hrang hrangah rawngbâwlna a nei thîn.

Pathian Thu sawi (preaching) leh Pathian faka zai leh lâm hi rawngbâwlna kawnga a tuina ber ber te an ni.