September 29 leh 30, 2020 khan Mizoram Baptist Kohhran, Planning Commission 2020  chu Sap Upa leh Pu Buanga Hall, Serkawn-ah an thukhawm.

Meeting hi BCM Planning Commission 2020 Convener  Rev. F. Ramdinmawia, General Secretary-in a kaihruai a, Sector pathum – Mission, Central leh Service Sector ten an chanpual theuh te zirchianna report pe-in, chumi atanga rawtna hrang hrang te lakkhawm chu an thlir ho a ni. Department leh Committee hrang hrang te kalphung leh inenkawl dan tur ruahmanna ruangam dinin, tun atanga kum 10 chhung atana BCM kalphung tur leh hmalak dan tur ruahmnna leh rawtna an siam chu Assembly Executive Committee, January 2021 ah thlen chhoh a ni ang a, Assembly Executive Committee-in a pawm hnu-ah Assembly 2021-ah pawmpui turin thlen a chhoh leh a ni ang.  Planning Commission 2020-ah hian member 16 an awm a, Sector lian pui pui pathum – Central Sector, Mission Sector leh Service Sector-ah te then a ni.

Central Sector-ah hian General Secretary Rev. F. Ramdinmawia chu Convener niin Planning Commission member panga an awm a, he Sector hnuaiah hian Pastoral Department, Administrative Department, Fellowship Organisations, Finance Department bakah Pension Board te a chang a.

Mission Sector-ah hian AGS i/c Mission chu Convener niin Commission aiawh member 6 an awm thung. Mission Sector hian BCM hnuaia Mission rawngbawlna bik an thlir thung a ni.

Service Sector-ah AGS i/c Service, Rev. R. Lalbiakliana chu Convener niin Planning Commission aiawh member panga bakah Department & Institutions Head te an tel a. He Sector hian Medical and Health, Education, Communications, Christian Education, Baptist Literature & Printing, Social Concern, Relief & Development Department te a chang a ni.

Tun tum Planning Commission thukhawm hian ruahmanna hrang hrang te leh zirchianna report hrang hrang te a thlir a, January thla Assembly Executive Committee hma a vawi khat emaw thukhawm leh in Planning Commission 2020 hi zialfel theih tura ruahman a ni.