September 5,2012: Vawiin, September 5, 2012 zing dar 10:00 khan Sap Upa leh Pu Buanga Hall, Serkawn-ah BCM Pastorte Chanchin (Biography of  BCM Pastors) tih lehkhabu chu Rev. Dr.K.Lalrinthanga, AGS Mission-in a tlangzarh. Tlangzarhna Inkhawm hi a hranpa-in buatsaih a ni lo va, BCM Hqrs, Office-a thawktute Devotion hun hman zawh-ah Tlangzarh a ni. He lehkhabu hi phek 450 zeta chhah a ni a, Pastor 206 te chanchin a chuang. Pastor hmasa ber Rev. Chuautera 1914-a Ordained leh 2011-a ordainte bakah Pro.Pastor 2012-a lut thar te chanchin a chuang kim vek a ni. A bu lei duh te tan Rs. 200/- in Baptist Book Room-ah te lei theih nghal a ni.

.......................

 

CHHUAHTU THUHMA

BCM Pastor-te Chanchin hi Rev. V. Lalzawnga hmalaknain BCM Communications Department chuan 1997 kumah a lo chhuah tawh a. Chutihlaia hming chuang zat chu 94 an ni. Hun a lo kal zel a, Pastor kan lo pun ve zel bakah chhut khatnaah Pastor thenkhat mahni chanchin pek luh loh avanga hming chuang lo an awm nual avangin, kimchang zawk a chhut leh duhna a lo awm ta a. Chhut hnihna buatsaih tur hian Rev. V. Lalzawnga bawk chu hma la tura ruat a ni. Pastor zawng zawng hnenah questionnaire thawnin an chanchin lak khawm hna a thawk a. Pastor boral tawhte pawh an chhungte hnen atangin a theih ang angin an chanchin lak khawm a ni. Questionnaire emaw, mahni duhdana ziak emaw kan thawn let lawk loh avangin, lak khawm chhungin kum eng emaw zat a vei hman a. Chutih chhungin office lama a buaipuitute pawh an inthlak hman nual bawk a, chuvangin a buatsaih chhung a rei ta hle a ni.

 

Hetianga a teikual chhung hian kalphung insawi danglamna avangin Publication Board pawh Communications Department atangin Baptist Literature and Printing Department-ah dah a lo ni ta a. Literature Reader kan neih mai loh avangin, Rev. V. Lalzawnga hma lo lak tawhna chu a chhunzawmtuah ka tang ta a. Ka theih ang tawkin a vaiin ka edit vek a.  A tawp a tawpah hetiang hian tihpuitlin a ni ta hram a ni. Manuscript ka hmuh mai theih tawh loh avangin, ka hmaa miten an lo type-sa, Mualchin Publication-a an pek luh tawh atangin edit a ni a, theihtawp chhuaha edit a ni na a, tihdik tawk loh pawh a awm nual mai thei. Chutiang a lo awm a nih chuan ngaihdam ka dil e.

 

A ziak dan kalhmang hi chhut khatna atangin hetiang hian tihdanglam a ni:

1.    Zawnawlna (index) hi alphabetical order-in dah a ni. 2.    Index phek dawtah hian service seniority list leh an pian kum dah a ni. 3.    A indawt dan hi service senior dan indawtin dah a ni a, seniority inangte chu mimal kum upat dan indawtin dah leh a ni bawk. 4.    Mahni chanchin ziak tam zawng a inang lo hle a, senior-hote chu anmahni leh an chhungten an ziak anga dah a ni deuh ber a, a sei zualpui chauh  paih then a ni. 5.    Thangtharho, 1980 hnu lama Pastor-te chanchin chu a inang tlang thei ang berin ziak a ni a, a bu a chhah lutuk loh nan, thu thuartham deuhte chu paih then a ni. 6.    Nupui fanaute chanchin ziak tel kan awm nual na-in, a bu a chhah lutuk loh nan leh chhungkua kan inan loh hlawm em avangin, Pastor-te chanchin chauh chhui a ni.

He lehkhabu chhuah chungchangah hian, retire tawh hnua nasa taka buaipuitu, Rev. V. Lalzawnga hnenah Publication Board aiawhin lawmthu ka sawi a. Hun lo kal zel turah BCM document pawimawh tak a nih ngei ka beisei.

Rev. C. Ngurhnema

 AGS, Service. & i/c Publication Board Baptist Church of Mizoram.