R&D -in Chhawmdawlna pe
April 10, 2013 khan BCM, R & D chuan Zawlpui-a In kang tuarte tan Thosilen 12 leh Silpoulyne 12 an pe a, hnatlangte thingpui lumna tur Rs. 3,000/- a hmunah kalin an pe bawk.
Hqrs.Office Worker Retreat
Tunkar thawhlehni, April 16, 2013 khan BCM Hqrs. Office, Serkawn-a thawktute chuan Sap Upa leh Pu Buanga Hall-ah Workers’ Retreat nilengin an hmang a. Speaker-ah Rev. F. Sangvela, President hman a ni. Zing dar 9:30 atangin zan dar 7:00 thleng hun an hmang a, thawktuten hlawk thlak an ti hle. Tun-ah hian BCM Hqrs. Office-ah hian General Secretary hovin thawktu 60 vel an awm mek a ni.
HATIM Result tha
Tunhnaia MZU hnuaia BCA III Semester leh V Semseter Result chhuakah HATIM chu an result a tha leh hle. III Semster-ah hian 16 Exam-in Distinction leh First Division-ah an passed vek a, V Semester-ah hian mi 11 exam-in an vaiin 1st Division-ah an passed vek bawk. Tunah hian HATIM-a kal duh zirlai lak sen loh an awm tan mek a, Kawmzawl-a Campus thar tur-ah Hostel mi 200 lenna tur ngawrh taka sak mek a ni.
KNP Inkhawmpui
#Kar hmasa April 12-14, 2013 khan Lawngtlai South Bial KNP Inkhawmpui, Chawnhu-ah an nei a, KNP ten nuam an tiin an hlim hle. Nimin leh vawiin hmang hian Serkawn Bial KNP te pawhin Upa K. Lalnuntluanga Speaker-a hmangin Serkawn Biak Inah Inkhawmpui an nei dawn a, thupui atan ‘Sual huat’ tih a ni ang. BMP & TKP Meet
# Zobawk Pastor Bial BMP te chuan tun Inrinni hian Zobawk Mual-ah Sports Meet an nei dawn a Zan lamah Inkhawm leh Fellowship Programme nei zui chhun lama an inelna result puan leh Lawmman semna an nei nghal ang. Zobawk bialah hian BMP Unit 8 awmin member 400 vel an awm a ni.
# Karleh Inrinni leh Pathianni (April 27-28) hmang khian Serkawn Pastor Bial TKP te chuan Bial TKP Meet, Zohnuai East-ah an hmang dawn a, Speaker-ah Upa Dr.CD Lawma a ni ang a, thupui atan "Intihsiakna tha" tih an hmang ang. Inrinni chhun-ah nilengin infiamna leh intihlimna hun an hmang ang a, Inrini zan atanga Pathianni zan thleng Biak In lamah hun an hmang thung dawn a ni.
ATC-ah Convocation
Vawiin hian ATC (Arunchal Theological College)-ah Convocation & Compassioning Programme pawimawh tak an hmang dawn a, tun tumah hian B.Th zir chhuak 4 leh Diploma in Theology (Dip.Th) zir chhuak 6 te hnenah Certificate hlan an ni ang. Speaker Rev. Udoy Kumar, Regional Director, ATA (Asia Theological Association ) a ni ang. Tun tum hi ATC atanga B.Th. graduate an neih hmasakna ber a ni a, thawktu 14, Lecturer 6 tiamin an awm mek a ni. ATC hi Itanagar khaw pawn, Moinhappa bula awm a ni. BCM hian Missionary (Lecturer) pakhat, Lalchhuanawma Sailo kan tir ve a ni.
Kohhran Dingthar
April 14, 2013 zan khan Upper Republic Bial, Melriat-ah Baptist Kohhran-ah Baptist Kohhran a dingthar a. Rev. F. Sangvela, BCM President leh Rev. H. Sangchema, President Elect ten he hun hi an hmanpui. Report kan dawn danin Melriat Kohhran dingthar-ah hian member 20 vel an awm sa a ni.
