ASSEMBLY ROREL TURA SAWMNA
Rev. H. Lianngaia, General Secretary, Baptist Church of Mizoram chuan BCM Rorelna sang, ASSEMBLY Rorel palai turte hnenah sawmna leh thuchah a siam a. Rorel tur hian Constitution-in a ruat ang taka palai dik takte chauhvin ro an rel a pawimawh thu leh Palai kal thei loten aiawh intirh theih a ni loh thu tarlangin Pathian leh a Kohhrante aiawha rorelna dawhkan kil pha chinte chu kim taka kal turin a ngen.
Mizoram baptist Kohhran Rorelna Sang ber BCM Assembly chu March 6 - 10, 2013 hian Lunglawn-ah nghah a ni dawn a. Hemi atan hian a dawltu Lunglawn Kohhran leh Headquarters lam te pawh nasa takin an inbuatsaih mek a ni. Kumin Assembly thupui tur chu “I puan in hmun chu zauh rawh” (Isaia 54:2) hman a ni ang a, he thupui then hrang hrang hmang hian Bible Study leh Inkhawm -ah thuchah leh thuzir neih thin a ni ang.
April 12-ah Chagre Inhlan dawn:
BCM chuan hruaitu thar eng emaw zat kan nei tih kan tarlang tawh a. Heng hruaitu thar, Headquarters Office-a thu turten mawhphurhna an lak tan ni atan April 12, 2013 ruat a ni a. Headquarters Office-ah charge inhlanna urhsun neih tum a ni. Hetih laiin Bialtu Pastor thenkhat chu an awmna tura ruatah an thu fel tawh a, a nawlpui chu Assembly zawh atangin an insiksawi hlawm dawn a ni.
New Serchhip Kohhran Silver Jubilee:
New Serchhip Kohhran chuan February 21, 2013 khan an din champha kum 25-na Silver Jubilee lawmna leh Biak in thar hawnna an nei a, General Secretary, Rev.H. Lianngaian a hmanpui. New Serchhip Kohhranah hian member 530 vel an awm mek.
Counselling Training:
Paithar Pastor bial chuan February 23-24, 2013 hian Sihtlangpui Kohhranah Counselling Training an buatsaih dawn a. Headquarters atangin AGS i/c Service, Rev.C. Ngurhnema leh Christian Counselling Organiser, Nl. Daisy Zomuani te an kal ang. Tin, Electric Pastor bial chuan Chanmari Vengthlang Biak inah kar kal ta, February 16 khan nilengin Upa leh Rawngbawltuten Counselling Training an nei a. Resource person atan Rev. Lalremsiama Fanai, CHS Chaplain leh Nl. Daisy Zomuani, Christian Counselling Organiser- te an hmang.
AGS i/c Mission Tripura leh Chennai-ah:
AGS i/c Mission, Rev.Dr.K. Lalrinthanga chu Tripuraa Native Worker-te pualin Retreat St.James High School, Gongarai-ah a hmanpui mek a, Report kan hriat danin Tripura Field-a Native Worlers te an kal tha hle a, damlohna avanga kal thei lo 2/1 tih loh chu an kal kim vek a ni. Tripura-ah hian Native Workers 60 chuang zet BCM hian kan ruai mek a ni. Rev.Dr. K. Lalrinthanga hian Retreat a hmanpui zawh hian Tripura Field-a BCM Mission hmun te a tlawhkual nghal ang. Tripura-a progamme a hman zawh hian Chennai lam a pan nghal ang a, Interserve ho buatsaih National Consultation on Global Mission-ah a tel ang. AGS hian BCM Mission rawngbawlna chanchin presentation a nei ang.
BCM chanchinbute Board khat hnuaiah:
BCM Administrative Committee chuan Kohhran Beng leh Baptist Today chauh ni lo, Department tihchhuah chanchinbu dang- Missionary Tlangau, Thalai Entu, Loisi, Naupangte Thian te chu Communication Editorial Board hnuaiah awm vek turin a rel a, hei hi thuchhuah chungchang him zawk leh rualkhai zawka a kal theih nan tih a ni.
Chhipphir bial TKP Inkhawmpui:
Chhipphir Pastor bial TKP chuan February 22-24, 2013 hian Bualpui ‘V’ Biak inah inkhawmpui an nei a. MTKP Organiser, Rev. Samuel Lalremsanga chu speaker a ni a. Electric bial zaipawlten an tawiawm.
Zobawk bial BKHP Inkhawmpui:
Zobawk Pastor bial BKHP chuan February 22-24, 2013 hian Ralvawng Biak inah Inkhawmpui an nei mek a. Speaker atan an bialtu Pro Pastor, VL.Nithanga an hmang a, thupui chu Rinawmna a ni.
