Mizoram Baptist Kohhran-a Missionary thawk lai, Pi B. Laldinpuii, Evangelist Teacher, BMS, Betbonya-a thawk, Pu K. Lalrualkima, Area incharge, Longpuighat Area nupui chu April 19, 2023 zing (dar 8:30) khan Trinity Hospital, Aizawl-ah a boral a. Trinity Hospital ah thlahna hun Rev. R. Lalrintluanga, Executive Secretary, Aizawl in hmangin, Pi B.Laldinpuii ruang hi an inpui Lawngtlai pana phurh a ni a. Kawng dung tluanin Kohhran ho ten lo hmuak zelin thlahna thilpek leh pangpar te an lo hlan a, BCM Headquarters Office, Serkawn-ah chawlhpui a ni a.
General Secretary Rev. R. Lalbiakliana kaihhruaina-in BCM hruaitute leh thawktute leh Kohhran hrang hrang aiawh ten an lo dawngsawng a, a kuangah pangpar dahin Rev. Dr. R. Lalthanmawia, AGS Mission-in tawgtaia a thlah hnu ah, Pi Te-i ruang hi Lunglawn ah chawlhpui a ni leh a, hemi hnu hian Lawngtlai lamah phurh phei a ni.
Lawngtlaiah hian an inpui ah chawlhpui a ni a, Kohhran hoten thlahna hun an hman hnu ah Pi B.Laldinpuii te khua leh missionary-a a chhuahna khua South Vanlaiphai panpui a ni a, April 20, 2023 ah BCM Biak In, Ariel, S. Vanlaiphai-ah thlahna leh Vuina neih a ni a, hemi ni vek hian S.Vanlaiphai thlanmualah thah liam a ni.
Pi B. Laldinpuii hi Bialtu Pastor, South Vanlaiphai Rev. Zadinglian'n vuiin, vuina inkhawm ah hian Rev. Dr. C. Lalruatthanga, Director Chakma Mission leh Chakma Baptist Kohhran hruaitu te engemawzat bakah a rawngbawlpui missionary te an tel.
Pi B. Laldinpuii (Te-i) hi Pu Rotluanga leh Pi K. Lalengmawii fanu niin, January 25, 1961-ah Darzo ah a piang a. 1988, May 11 atangin BCM Missionary ni in Chakma zingah rawngbawlin hmun hrang hrang ah a awm a, Kum 2004 ah a rawngbawlpui missionary tho Pu K. Lalrualkima nen innei in, fa pahnih an nei a, a thih ni thlengin he hna hi a thawk a ni.
Mizoram Baptist Kohhran chuan Pi B.Laldinpuiin Pathian rawng a bawl tawhna te, a inpekna leh a tawrhchhelna te hi a hre reng a, a chhuang tak zet a ni. A hnathawh leh thiltih zawng zawng avangin Pathian hnenah lawmthu a sawi a, a kalsan tak a pasal, a fate te leh a thawhna Kohhran te a tawrhpui takzet a, Pathianin thlamuanin awmpui se tiin ui takin a thlah liam a ni.
