June 22, 2016 (Nilaini) chawhnu dar 1:00 khan BCM Hqrs.Office Serkawn, Sap Upa leh Pu Buanga Hall-ah Baptist Church of Mizoram (BCM) leh North East Consultancy Services (NECS) te chuan HATIM Administrative Block sak tur chungchangah MoU an ziak a. NECS lam aiawhin Pu Robert Romawi Royte, Chief Managing Director chuan hming ziakin, BCM aiawhin, Rev. F. Ramdinmawia, Gen. Secretary ten hming an ziak bakah, witness atan Upa Sailiana Sailo, IAS (Rtd) Gen. Manager NECS leh Dr. Rema Chhakchhuak, Principal HATIM ten hming an ziak bawk .Nimina MoU signed-na inkhawm tawite neiah hian Rev F.Ramdinmawia General Secretary BCM chuan thusawiin NECS ten BCM tana an inphalna leh inpekna chu ropui a tiin Kohhran tan an hlut zia a sawi a, Kohhran ho te thilpek tling khawm ringawt atang chuan hetiang hi vawi lehkhata han neih thei mai ani lova tuna NECS ten anmahni sum ngata sak zawh sak thuai an tum chu lawmawma tih thu a sawi a.
Pu Robert Romawia NECS neitupa pawhin thusawiin Kohhran ho tana hma an lakna chu an firm leh chhungkua ang pawha Pathian hnena lawmthu an sawi thinna a nih thu sawiin hlawkna nei lem lova rawngbawlna anga thawk theia an awm chu lawmawm a tih thusawiin HATIM chu Mizoram ah chhuanawm tak an lo nih tawh bakah mipuite chhawr zel tur a nih avangin anmahni ngei pawhin an ngaihhlu hle a ni tih a tarlang bawk a, NECS hnuaiah hian hnathawktu mi 150 vel an awm thu leh Engneer leh Architech 60 rual an awm thu sawiin ram chhung hmun rang hrangah hna an thawh thu sawiin Tuna HATIM building tur pawh hi kar leh atang chuan bungraw thenkhat chu a daih tur hmanrua dah nghalin hna tan nghal mai an tum tih a sawi bawk a ni.
HATIM Administrative Block sak tur hi 40x80 Feet a lian chhawng thum tur niin heta senso tur Rs 2,11,35,865.00 (Nuai zahnih sawmpakhat sing thum sangnga zariat leh sawmruk panga) a ni a, hei hi NECS hian an mahni sumin an sa dawn a, kum khat leh a chanve chhunga sak zawh tur niin, BCM hian kum 7 chhungin a sakna man pawisa hi a pung awmlovin an rul ve thung dawn a ni.
MoU signed zawh a nih hnu hian Kawmzawla HATIM Hostel sak zawh tawh chu BCM hruaitute leh NECS Team ten enin helai hmuna Administrative Block sak tur a hmunah an en nghal bawk a, nimina an MoU Signed leh hnathawhna hmun tur enna hi Thuthar lakhawmtu ten an tawiawm bawk ani.
