Tunhnaia Aizawl Laipuitlang & Ramhlun Venglaia chhiattawkte chu BCM in Relief &Development Department kaltlangin Rs. 10,000/- in a tanpui a. Tin, mitthi chhungte hnenah Rs. 3,000/- theuh a pe. Tanpuina hi Chhiatna thlen ni, May 11, 2013 Inrinni khan Central YMA Emergency Relief Duty te hnenah Rs.10000/- a tul a hman atan hlan a ni a. Tin, Mithi chhungte hi Vuina leh a remchanna hmun leh hunah theuh pek an ni bawk.
He chhiat tawh thu hriat a nih veleh General Secretary, Rev. H.Lianngaia chuan Tuarpuina thu sawiin, Kohhran hote mahni hmun theuhah tawngtaipui turin a sawm nghal a. Chhiatna thlenna hmun, Aizawl lamah Chaltlang Kohhran Biak In Hall chu Ruang dah lailawk nan leh thlah na atan buatsaih a ni a. Heta tang hian ruang chhuak tur te buaipui an ni a, Tin, Thingfal lama vuina-ah BCM hruatute Kohhran aiawhin an kal a. Tin, he chhiatna avanga boral ta, Pu. Lalnunmawia BCM Ramhlun 'S' chu BCM hming ral nghal a ni a, May 12, 2013-a Thingfala phurh pheite chu BCM aiawhin Pastoral Coordinator, MTKP Organiser leh hruaitu dang ten zui pheiin BCM aiawhin an ral bawk. May 13, 2013 Thingfal panpui mi pahnihte ruang chuan Serkawn a rawn paltlang laiin General Secretary, Rev H Lianngaia hovin Kohhran hruaitu pawimawh te leh Hqrs.-a thawktu ten an lo hmuak a, ralna thilpek pekna leh tawngtai sakna hun an lo hmang bawk. May 15, 2013-a he chhiatna thlenga ruang lak chhuah hnuhnung ber pahnih, thingfala vuina-ah BCM hmingin Kohhran Rev. Lalthangliana Hnamte tirh a ni veleh a, a ni hian BCM aiawhin thu a sawiin ralna sum a hlan bawk.
