Vawiin Zirtawpni October ni 9 nileng khan Baptist Church Of Mizoram Headquarters Office Serkawn-a thawktu te chuan faina hapta hmangin nileng in BCM Headquarters Office leh a chhehvel vantlang hmun leh kawngpui te tihfaina hun an hmang.
Faina Hapta hawnna inkhawm tawi ah Rev. F. Ramdinmawia General Secretary chuan faina hapta hman kawnga fuihna chungchang sawiin, Faina hapta hi kum tina BCM thawktu tena khel lova an hman thin a nih thu te a sawi a. Kumin ah phei chuan High Power Commirttee, Lunglei hmalakna-a "Beautification of Lunglei" Programme kal tlanga faina mai piah lama BCM Headquarters Office hmunhma a mawi thei ang bera thing phun leh thil dang te a chei chhoh mek a nih dan te a sawi a.
Mizo te tana kan ro hlu Missionary hmasa ber Pu Buanga leh Sap Upa te chenna bungalow leh a chhehvel chei hnum lehzual tura ruahmanna kalpui mek a nih dan te sawi lang in, Serkawn Kohhran hmunpui leh a chhehvel hi Lunglei khawpui chhunga hmun fai ber leh thianghlim ber a nih mai bakah, hmun mawi tak ni chho zel tura thawktu zawng zawng te tan la sauh sauh turin a chah a ni.
BCM Headquarters Office He faina hapta hmanna hun ah hian loh theih lova office-a hnathawka awm ngai tih loh te chu tel vekin mi 70 vel an thawk chhuak a ni.
