Mizoram Baptist Kohhran, Executive Committee Meeting neih mekah hun hmasa lamah Inthlanna neih a ni a. General Secretary ni mek, Rev. H. Lianngaia chu thlan nawn leh a ni. Rev. H. Lianngaia hi kum 2004-2007 leh 2010-2013 ah te General Secretary atan thlan niin he hna hi a lo chelh tawh a, tunah hian a vawi thum nan General Secretary atan thlan a lo ni leh ta a ni.

Rev. H. Lianngaia Chanchin tlangpui

Rev.H. Lianngaia hi Hauchhum hnam a ni a, a pa chu H. Thangkima a ni a, a nu chu P. Dengbuaii a ni. Kum 1953 July ni 12-ah khân Pângzâwl khuaah a lo piang a, ft 5’, 8”-a sâng a ni. An unau hi mipa 3 leh hmeichhe 3 an vaiin 6 an ni a. Kum 1968 November thlaah Pângzâwl Baptisma a chang a, Kum 1978 July ni 10 niin Nl. R. Lalsiami nên Pângzâwl BCM Biak inah an innei a, Rev.B. Thangseia’n a vawntîr a, fapa 1 leh fanu 2 an nei.

Kum 1975 khân October thlaah Pângzâwl Pastor Bial |KP ten Camping an buatsaih a October ni 24 zâna Pathian hnêna a inhlanna chu piantharna bâkah dam chhûnga Pathian rawngbâwl tûrin a thinlungah a nung ta reng a ni. Tichuan H.S.L.C. a pass veleh 1975 kum khân Pathian thuzir a dîl ta a. Tualchhûng Kohhran te Pastor Bial te ABC-ah te a dîlna chu a kal chho zêl a, Assembly pawh chuan duhsak takin a dîlna chu a hlawhtlin tîr ta a ni. Hetiangin Pathian thu a zir.

 (1) B.Th. - E.T.C (Eastern Theological College) Jorhat-ah 1976-1980. An Batch-ah a ti ha ber a ni a, ti ha ber lâwmman (General Proficiency Prize) a dawng nghê nghê.

 (2) B.D. - U.B. S. (Union Biblical Seminary) Pune-ah 1988-1989. Kum 8 zet Pastor Bial neia a thawh hnuin a zir ve leh a, kum khatah B.D a zir zo thei a ni. Pathian thu zirnaah a kal tluang hle.

B.Th a zir zawh veleh 1980 atangin BCM chuan Pro. Pastor-ah lain a ruai nghâl a, 1984 khian Lunglâwna BCM Assembly-ah chutih laia General Secretary Rev. Dr. C.L. Hminga’n Minister-ah a nemnghet (Ordained) ta a ni. Pastor a nih chhûnga a awmna bial leh hna hrang hrang a vawnte chu hetiang hi a ni.