April 25, 2015-a Nepal Lirnghing avanga chhiatna thlengah Mizoram Baptist Kohhran chuan May 2.2015 zing karah Emergency meeting koin hma lak dan tur an rel a, thil awm dan te mit ngei a hmu a, Missionary te leh Kristiante thlamuan tur te, a theih anga tanpui dan kawng zawng turin a hmuna kal ve ngei a rel a. BCM Relief & Development Director,

Pu MS Dawngliana chu kal turin a ti a, hetihlai hian Baptist World Aid (BWAid) pawhin BCM aiawha kal Pu MS Dawngliana hi BWA aiawh atan an awn ruat nghal bawk a, BCM leh BWA aiawhin Nepal-ah hian a kal ta a ni. May 4, 2015 khan Kathmandu thlengin nihnih a cham hnu-ah Mizoram lamah a lo haw leh ta a ni. Nepal lirnghing tuarte tanpui dan tur hi BWAid leh BCM chuan kawng a zawng mek a ni. (Report chhiar rawh le)

Nepal ram lirnghing a hmuna tlawh report

M.S.Dawnglian, Director, BCM Relief and Development Department

Nepal ram chu Lirnghing nasa takin a nuai a, mi tam tak an thi a,

in leh ram tam tak a chhia a, kan Missionary-te pawh an chiaiin khawlai hmun himah an riak ani tih kan hriat veleh BCM hotute chuan eng tianga hmalak tur nge ni ang an ti a. Chu tih lai chuan Asia Pacific Baptist Aid lam hotute chuan kan ringtu puite tlawh pahin an chhiatna te tanpui theih dan kawng a awm em I han tlawh ang u hmiang an rawn ti a. BCM Relief and Development Department chuan a tulna te avangin Dt 2.5.2015 zing karah Emergency meeting koin a hmuna kal ve ngei a rel a.

Hetihlai vek hian Baptist World Aid Director pawhin BCM chu BWAid aiawhin kan ring nghal che u an rawn ti ve bawk a. Lirnghin atanga a ni Kuan Dt.4.5.2015 chuan Kathmandu khawpui kan han thleng a. Airport atangin a lo buai nuai nuai a. America chhanchhuahna sipai thlawhna Bell Boeing-te pawh a lo in hung rup tawh mai a. Airport-ah kan Missionary, Rev. C. Rodingliana leh James Lalnunhlua ten min lo hmuak a, Living Baptist Church, Lalitpur-ah Nepal Baptist Church Council hotute nen kan inhmu khawm nghal a, chhiatna an tawh dan report tlangpui leh Tanpuina an thawh dante an report zawk zawk a. Chumi hnuah kan Missionary Rev. Dinga-te in lamah thleng turin ka phei a zan rei tak thleng report ziakin kan meng ho va, BWAid lam pawh kan thil hmuh leh hriatte kan hrilh ve zel bawk a. Ni hnih ka chama ka cham chhung hian lirnghing avanga chhiatna thlenna hmun hrang hrangleh kan Mizopui Salvation Army lama thawkte, Friends Church lama thawkte kan tlawh bawk a. Chhiatna rapthlak tak, hnam dang karah kan Mizote Pathian pakhat ringtu kan nih angin chhungkua ang maiin an lo khawsa a anin thlamuan tawn hle a, ropui ka ti hle.

Nepal ram mi maktaduai 27 vel a maktaduai 8 velin he lirnghing avanga chhiatna hi tuara chhut ani a. Thingtlang kilkhawr zawk leh in chhia atang hian report tun thlengin a la luh belh zel a, thi leh hliam pawh an la hriat belh chhoh zel ani. Chu tih lai chuan Nepall rama Kristian 2% chang chang vel aw, pawh mi 700 vel thiin Biak In pawh 8 chhiain NBCC chuan a sawi a.

Dt 05.05.2015 a Nepal sorkar report (source Government of Nepal)

	Thi	Hliam	Sorkar in chhe hlauh	Sorkar In a then lai chhia	Mimal In chhe hlauh	Mimal In a then lai chhia
Total	7,652	16,392	10,761	14,804	279,234	237,068

Dt 8.5.2015 a kan hawn hnuah lirnghing na takin a sawi nawn leh avangin chhiatna leh harsatna in a bawh belhchhah leh hle ani tih chu kan hre theuh awm e.

He chhiatna hi khawvel pawhin Chhiatna rapthlak lian thamah a puang nghal a. In leh lo chan tam tak te hi Kathmandu khawlai hmun awl zau laiah a hlawmin camp siamsak an ni a, vawiin ni thlengin chutah chuan an la riak khawm a. Ei leh in leh engkim a harsa a. Tanpuina thawktuten theih tawp chhuah mahse a la tawk zo lo hle ani.

Inchim kar atangte chuan thil tawih rim chhe pui pui te a rawn chhuak tan a, inchim in bawlhlawh a siamte chuan boruak ah bawlhlawh nawi tam tak a ti pung a, hengte avang hian hripui a len mai pawh mithiamte chuan an hlau a an fimkhur hle ani. Sa pawh hri leng hlauh avangin sorkarin zawrh a khap rih ani. He tih lai karah hian Rukru-ten rem chang lain thil te an lo ru a buaina nghawng hi a la chhe zel rih chu ani.

Nepal ram hi Mizoram anga tlang ram ani ve a. Thingtlang lam pawh lirnghing avanga leiminin in leh nunna tam tak a ti chhi a, vur ram a mi tei vak pawh vur tawlh avangin tam tak an thi a, an in hliam bawk a. Chin hriat loh hi thingtlang lam leh Vur hmun tlang lamah te tam tak an la awm ngeiin rin ani.

Kathmandu khawpui a In chim tam zawk hi a hlui tawh bakah ban mumal nei lova sak an ni a. Phaizawl ni mahse lirgnhingin a han sawi tak tak chuan pawn lamah lang mawi viau mahse a chhe hmaah an tang nge nge niin a lang. In sak bakah a theih ang anga lo in ring lawk te chu an him nge neg ani. Kan missionary-te chuan Earthquake alarm an lo nei a, mihringin a hriat tham loh pawh a rawn hriattir a, chutianga thawm a awm tawh chuan naupang pawh kawngka hnaihah an nu ban vuanin tlan chhuah in peih takin an awm a. An lainatawm viau laiin hetiang chhiatna lo thleng thei laka chet dan him tha tak min zirtir hle ani.

Tun tum Lirnghing avanga harsatna belhchhah thei tam tak a awm a, chung zingah chuan: Bawlhlawh chitin leng vel avangin Hripui a leng thei. In awn bei bui senghawina kawngah mi tamtak nunna leh indang tih chhiat a la hlauhawm hle. Khawlai hmun awl riahna hmun hi an in chan lo hle dawn a, chu bakah bawlhhlawh paih khawmna tur an thlan te pawh mihring tan hriselna atan a him lo hle bawk dawnin an hriat a. Hei hian insual buaina a thlen thei. Hindu ram, chi inthliarna awmna ram ani a, hnam hnuaihnungte chan a chhe thei hle bawk. Chhanchhuahna leh chhawmdawlna hna thawktute leh a ram sorkar leh mipuite in lungrual leh phawkhai rual taka an thawh thiam loh chuan harsatna a thleng their eng bawk. Enge kan tih ve theih Tun dinhmunah chuan a chunga harsatna kan han tarlante khi hrerengin leh Tawngtaina a Tanpui hi kan tih theih hmasa ber chu ani awm e. Baptist pawl hrang hrang leh Kristian pawl dangten, tanpuina hna an thawhna kawngah in lungrual a thawh hona tha an neih theih nan leh Nepal-a kan ringtu pui ten harsatna hi midangte Pathian hnena hruaina atan Malsawmna a an chantir theih nan. Mizoram atanga thlamuang taka tanpuina kan thawn chhuah ve theih ngeina atan Sorkar atanga phalna kan neih theih nan.