MIZORAM BAPTIST KOHHRAN

INTHLAN THUCHAH: 2013

Mizoram hi Lalpa zawn chhuah ramah kan chhâl tlat thîn a. He ram lo indin chhuahnaa Pathian hmanrua, Mizoram siamtu chu Krista Chanchin Tha leh a Kohhranhote hi kan ni. Chuvângin vawiina Mizoram kalsiam leh nakina a hmakhua tûr thlîrin kumin 2013-a Mizoram State Legislative Assembly Inthlanpui lo awm tûrah hian inthlanna thianghlim leh felfai neia sawrkâr tha tak din a nih ngei theih nân Mizoram Baptist Kohhran chuan a hnuaia thuchah hi a siam a. Mipuite, Political Party leh Candidate zawng zawngten ngai pawimawha zâwm theuh tûrin a ngên a ni.

1. Mipuite Hriat Tûr

1)Indiakhua leh tui dik tak, vote neite chuan vote thlâk theuh ni se.

2) Inthlan boruaka vehthlêmna sum leh therhlo lêng vêl thîn hi khuareiah kan thatpui chuang lo tih hriain i hnâwl ngam ang u.

3) Inthlan campaign tûl lai denchhena Party leh Candidate-te laka thil phût neih hi chîn hauh loh tur a ni a, kanramin a thatpui ngai lo a ni. Mimal, pâwl hrang hrang leh Kohhran pawhin tih loh tûr a ni.

4) Candidate-te tihautak zâwnga chîm buai leh an ina chaw ei hut hut te chîn loh tûr a ni.

2. Political Party-te Hriat Tûr

1) Political Party tinten inthlannaa an Party thatpui tûr mai aiinkanram mamawh leh kan tu leh fâte thlenga kan that tlânna tûr thlîrin, an tihhlawhtlin theih ngei tûr election manifesto, party policy leh programme-te duan ni se.

2) Thlei bîk nei lova mi zawng zawng leh ram bial tinte huap zo sorkâr din tum tlat tûrin mahni Party mi leh sâte theuh zirtîr leh kaihhruai ni se.

3) Party tinin candidate atân mi hmingtha, ram leh khawtlâng thatna tûra thawk thei ngei tûr mi thlan chhuah theuh tum ni se. Eirûkna leh ruihtheih thil laka fihlîm lo te, mipat hmeichhiatna kawnga mi rinawm lote chu candidate-ah telh loh ni se.

4) Inthlanna muanawm takkanneih theih nân tawngka, thuziak, râlthuam leh hel pâwl hmanga inrîkrâpna te awm miah lo tûrin Party tinten tan lâk theuh ni se.

3. Candidate-te Hriat Tûr

1) In tin lûhchhuah (house to house campaign)-a sum leh therhlo dang hmanga invehthlêm leh vote lei hi tih loh ni se.

2) Vântlâng ruai buatsaih te, vote thlâk tûra khual khuaa awmte phurh khâwm te leh, hautak uchuak taka campaign banner, flag leh poster târ leh lehkha sem te tih loh ni se.

3) Khawtlâng leh dinna bial (constituency) bil tihlâwm nâna thilpêk leh thu tiam chîn loh ni se.

4) Candidate-te chu mipuite enrawn leh thangtharte entawn an nih angin inthlan lai leh inthlan zawh hnuah pawh belhchian dâwl leh hmingtha taka awm zêl tûrinkanbeisei a ni.

Sd/-

REV. F. SANGVELA

President

BaptistChurchof Mizoram

Sd/-

REV. H. LIANNGAIA

General Secretary

BaptistChurchof Mizoram

Issued by the Social Concern Department,BaptistChurchof Mizoram