BCM Assembly 2021 neihna hmun : Ramthar Biak In, Lunglei[/caption]
Mizoram Baptist kohhran Rorelna sang ber, BCM Assembly vawi 125-na March 10-14, 2021 chhunga BCM Biak In, Ramthar, Lungleia-a neih chu tluang takin zawh a ni ta a. Rorel palai 471 an kal a ni.
Assembly Rorel inkhawm hi BCM President Rev. Dr. V. Laldingliana’n a kaihruai a, March 11-13 (Ningani atanga Inrinni) nilengin rorelna neih thin a ni a, Ni hmasa ber ah President-Elect thlanna neiin Rev.Dr.R.Zolawma, Professor AICS chu President-Elect atana thlan a ni. Pathianni-chawhma Inkhawm-ah Pastor 4 C. Lalremmawia, Vanlalkima Khiangte, H. Vanlalvawna leh David F. Lalkhawngaiha te nemngheh an ni. Pathianni chawhnu-ah Lalpa zanriah, Sacrament kilho niin, Rev.Prof. R.Zolawma’n a buatsaih a, Zan lam programme siam lovin, Inkhawm banah Assembly hi an tiak ta a ni.
Kumina BCM Assembly Rorelna-in an passed langsar zual te:---
AICS-ah hian Senate of Serampore College (University) hnuaia Distance Studies, Bachelor of Christian Studies (BCS) hawn ve ni se tih rawtna chu remtih a ni. Board of Theological Education Department-in lo umzui rawh se tih a ni.
-
Mizoram Gospel Quasquicentenial hriatreng nan Upper Assam Field hawn thar hawng tura umzui leh hmalak mek chu Fieald thar atan hawn rem tih a ni.
-
Act East Policy leh a kaihhnawih zirchianna hi BCM hian neih ni se, Administrative Committee-in lo bawhzui rawh se tih a ni.
-
Mizorama kohhran hrang hrangten inpumkhata rawng kan bawlho theih nan leh harsatna hrang hrangte inthuruala kan hmachhawn theih nan Council of Churches in Mizoram din a nih theihna turin hma lak ni se, Administrative Committee-in lo umzui rawh se tih a ni.
-
‘Kan thalaite Central Service, All India Service, State Service, Army & Central Para Military Force-a an luh tam theih nana BCM-in hma lak ni se, Administrative Committee-in lo umzui rawh se tih a ni.
-
Covid-19 hripui a reh theih nan BCM pumpui hian awmni khama Tawngtai rual neih ni se’ Administrative Committee-in lo bawhzui rawh se tih a ni.
-
Planning Commission ruahmanna te a principle-in pawm a ni a. Planning Commission hi la ding chhunzawm se la, Assembly duhdan te hre rengin lo en nawn leh se, August, 2021 Assembly Executive Committee Meeting-ah report rawh se tih a ni. Planning Commission ruahmanna effective date atan March, 13, 2021 hman a ni ang.
-
Finance Committee kaltlanga Contract employee 43 te dah ngheh thu pawmpui tura report leh, Post thar 16 hawn dilna leh Post ruak 15 hnawhkhah dilna te Temporary post chelh lai mi 74 substantive post-a dah thu report te pawm a ni bawk.
-
Finance Committee-in Kum 2021-2021 atana BCM Budget a ruahman chu pawm a ni a ni a, Budget pumpui cheng nuai 11460 a ni. Kum 2020-2021 Budget aia a punna chu Nuai 898.61 (8.51%) a ni. Kohhran tum tur, (Target-a sem tur) chu cheng nuai 7,738.53 niin, kum hmasa aiia a punna chu cheng nuai 803.72 (11.59%) a ni.
-
Non-Mizo Mission inkaihhruaina a siam chu pawm a ni a. Mission Board Committee-in siamrem ngaite siam remin, a tul angin lo umzui rawh se tih a ni.
-
Jubilee Bible School-a Pastoral Counselling short course training nei tura ruahmanna chu pawm a ni a, Board of Theological Education-in tihhlawhtlin dan tur kawng lo zawng rawh se tih a ni.
