Mizoram Baptist Kohhran Rorelna sang ber - BCM Assembly, March 5-9 chhunga Serkawna neih chu tluang takin zanin khan an tiak ta. Hriat theih chianah Rorel Palai inziaklut zat chu - 958 niin Zaipawl member leh chhimtu dang chhiar tel an ni lo. Heng zingah hian Serkawn Kohhran huam chhunga thleng (Mikhual) riak lut zat chu 550-600 vel an ni. Rorel palai ziangah hian Kohhran aiawha palai - Kohhran Upa hmeichhia pathum an awm a. Palai upa ber chu Upa Lalthanga, LUangmual Aizawl niin kum 87 a ni. Assembly chhung zawnga thawhlawm tlingkhawm chu Rs. 98,569/- a ni a, hei hi Jubilee Bible School din tur atan hman a ni ang.
Assembly chhung hian zantin Vantlang Inkhawm neih thin a ni a, Assembly thupui - "Chanchin Tha Mitin Tan" tih chu thupui thensawm hrang hrang hmangin thuchah ngaihthlak thin a ni. Vawiin, March 9, 2014 chawhma inkhawm-ah Ordination Service atan hman a ni a, hetah hian Minister 6 (Pastor 5 leh Missionary 1) ordain niin Rev. H. Sangchema, BCM President-in a nemnghet a, Heng ordain thar te hian Testimony tawi an sawi theuh bawk. Chawhnu lamah Lalpa zanriah (Sacrament) kilhona neiin Zan lamah vantlang inkhawm neih a ni a, Rev. H. Sangchema, BCM President thar-in Inkhawm a kaihruai a, Rev. H. Lianngaia, General Secretary-in Assembly Rorel report a pe a, Rev. F. Sangvela, Outgoing Presdident-in Thuchah a sawi.
March 6-8 (nithum chhung) chhun lama Assembly rorel Inkhawm neih thin a ni a. Kumina Assembly Rorel thu passed langsar zual zingah - Mission Field thar - Jharkhan leh Arakan/Rakhine Field thar hawn te, Pay Commission 2013 hman tura pawm te, Mizoram Sorkarah 'State Day of Prayer' kum khatah ni khat hmang tura ngen te, Hospital Serkawn a hman tur Dialysis Machine leina tur special appeal siam te, Pastor Bial thar 2 hawn belh te, Post thar 9 hawn te,Kum 2014 ah rampum huapin, kan ram tan chaw nghei tawngtai nilenga neih te, BCM-in zuk leh hmuam do kawngah tun aia nasa zawkin hma lak te niin, 2014-2015 Budget atan Rs.559,725,300/- an pawm bawk.
Assembly dawltu - Serkawn Kohhrante inbuatsaihna tha tak leh inpekna ropui tak avangin palaite an lawm hle. Kum 2015 BCM Assembly chu Lunglei Farmveng-ah nghah niin 2016-ah Hnahthial Bazar Biak inah neih a ni ang.
