Mizoram Baptist Kohhranin Ramthima kan rawngbawlna zinga tun thlenga thawktu tam tak an la bun mekna Bodoland Baptist Church Association leh BCM thawhdunna kum 25-na champha, Silver Jubilee chu January 29-31, 2016 hian Partkijuli-ah lawm a ni dawn a. He hun hmanpui tur hian Mizoram atangin AGS i/c Mission, Rev. Dr. K. Lalrinthanga leh he lai hmuna missionary lo ni tawh kan senior pastor Rev. F. Sangvela leh Rev. C. Vanlawma te chu he Silver Jubilee hmanpui tur hian an kal a. Anni bakah hian Assam Field Director Rev. PC. Lalnunzira leh Regional Director, Rev. Joseph Vanlalruata te pawh an kal ang.
Kum 2000 BCM Planning thar chuan Birpara,Boro, Rabha leh Dhubri Field tih thin chu Assam-Bengal Field tiin Field khatah a chhung khawm ta a. Kum 2010 Planning thar chuan Lower Assam Field tiin Boro, Dhubri leh Rabha Area te chu Field khatah a dah leh ta a ni.Assam Boro Field-ah hian Mizoram Baptist Kohhran hian Rev.F.Sangvela chu 1988-1989 khan Missionary angin a tir lut hmasa ber a, Mision thawh dan tur te en felin rawngbawlna a tan a. Ram buai a nih avangin harsatna tam tak tawkin Jail-ah te a zu tang nghe nghe a ni.
Kum 1993-ah Rev. C. Vanlawma chu Field Director-ah dah leh a ni a. An mahni hnam pualin School - Jubilee english School Parkijuly din sakin, Missionary Pu L. Vanlalzuia te chhungkua nen hma an la ho a. Principal hmasa ber atan Pu SL Ngursailova Sailo chu Mizoram atangin mahni inpein hun engemawchen a thawk a. Chumi hnu-ah BCM Mision Department-in enkawl sakin zirtirtu(Evanelist Teacher)te a pek belh a, tunah chuan BCM Mission School pakhat niin BCM-in a enkawl chho ta zel a ni, nikum 2015-ah pawh a vawikhatna atan Matric(Madhyamic) exam hmachhawnin 100% in an passed nghe nghe a ni. Hei bakah hin Evangelism lama hma la tur Evangelist Missionary te a tir lut bawk a, Mission Field thang duang tak ni lo mah se, Chanchintha avangin hma an sawn ve hret hret a, tunah chuan Biak In pawh engngemawzat dingin Kristian pawh an pung chho ve zel a ni.
