May 13, 2012 Patianni hi Baptist Kohhrante khawvel pum huapa kan inthlunkhawmna ni pawimawh tak a ni a. BCM chuan vawiin thupui atan “Riangvaite tana Chanchin Tha” tih thu hi a thlang a; Kohhran tinah he thupui hmang hian thuchah ngaihthlak a ni ang a, Tawngtai Rual thupui siam sa hmangin Kohhran tinah tawngtai rual neih a ni ang a, tin hemi ni thawhlawm hi Hqrs. Kaltlangin BWA- hmunpui-ah thawn tur a ni bawk ang. BWA-ah hian ram 221 atangin Kohhran 176,892 inzawmkhawmin baptisma chang chin member 41,498,520 (Maktaduai 41, nuai li) zet kan awm mek a ni.(Edited from BWA Website)
...............
Tawngtai rual thupui: 1. BWA Hruaitute tan.2. BWA Rawngbawlna peng hrang hrang-Baptist Kohhran inpumkhatna te, Chanchin Tha hril hna thawh te, Chhawmdawlna hna thawh te, Zalenna leh dikna humhalh hna thawh te leh Pathian Thu (Theology) dik leh him taka zirtir.
3. BCM Hruaitute leh Kohhran zawng zawng tan. 4. BWA General Council meeting ni July 2-7, 2012 Santiago (South America) neih tur tan. BCM pawhin palai kan intir thin. 5. Thawhlawm hlanna (Hemi ni thawhlawm hi Hqrs Serkawn a thawn tur a ni a. Chu chu BWA Headquarters Office 405 North Washington Street. Falls Church,VA 22046.USA ah thawn a ni thin................
BWA Day Thuchah (Biak ina chhiar chhuah tur):1. BWA Din tan dan: Baptist World Alliance (BWA) hi khawvel pumpuia Baptist Kohhran te insuihkhawm a ni a. Kum 1905 khan London khawpui a Exeter (Ekzeter) Hall-ah din a ni.
John Newton Prestridge-a chuan kum 1904 khan a Chanchin Bu chhuah thin ‘The Baptist Argus’ah chuan Khawvel pumpuia Baptist Kohhrante intawhkhawm rawtna a chhuah a; chu thu chu John Howard Shakespeare-a chuan a chanchin bu chhuah ve thin ‘The Baptist Times and freeman’ah chuan sawimawi zuina a chhuah ve leh a. Chu thu bawhzui chuan Baptist Union of Great Britain (Sap ram Baptist Inzawmkhawm) chuan October 1904 khan khawvel pumpuia Baptist Kohhran Inkhawmpui (Congres) neih chu an rel thlu ta a. Tichuan London khawpuiah July 1905 khan Inkhawmpui hmasa ber chu neih a ni ta. Kumin 2012 hi BWA kum 107-na a ni.
2. BWA Din Chhan: Kum 1905 Inkhawmpui chuan Constitution mumal tak a siam ta a. “BWA hi khawvel pumpuia Baptist Kohhran zawng zawng te’n Pathianin Isua Kristaa thil engkim fawkkhawm a tum tipuitling tura rinawm taka thawkho tur leh khawvel pumpui hi Krista ta a nih theih nana thawkho tura din a ni”.
3. BWA thil tum pawimawh zualte: BWA chuan rawngbawlna tam tak neiin hma zau tak la mek chungin heng thil 5-te hi a ngaih pawimawh zual te an ni:
1. Pathian Chibai buk te,Inpawlhona leh Inpumkhatna chhawm nun leh tihhmasawn zel. 2. Mission and Evangelism lam veina leh thahnemngaihna nasa tak neih pun zel 3. Tanpui ngaite tanpui (relief) leh ram leh hnam hmasawnna tura thawh 4. Pathian duh zawnga Dikna leh Mimal zalenna humhim 5. Khawvel danglam zelah a hun lai mila a mamawh dik tak Pathian Thu hriattir.
4. BWA Kum 5 chhung Rawngbawlna Thupui: Kum 2010 atanga 2015 chhung hian BWA chuan hetiang hian kum tin thupui hrang neiin rawngbawlna hma chhawp a nei a. Heng thupui khaikhawm nan “Thlarau Thianghlim Nen”(In step with the Spirit) tih chu hman a ni. Hetiang hian:-
2010 – 2011… Pathian hnena mahni inhlanna (Consecretion)
2011 – 2012… Chanchin Tha Puan darh hna thawh (Proclaimation)
2012 – 2013… Kristaa Zalenna nun leh sal tang chhuah (Liberation)
2013 – 2014… Krista anna a Siam thar leh danglamna. (Transformation)
2014 – 2015… Pathian rawngbawl tura inpekna. (Dedication)
Tichuan kumin chhung hi chuan Thlarau Thianghlim hruaina zela Chanchin Tha puan darh hna thawh rawngbawl hna hi kan thupui neih lai mek chu a ni. Ramthim hmun chauhah ni lovin kan chenna hmun apiangah Chanchin Tha hi a tam thei ang bera sawi turin i inbuatsaih ang u. Mi zawng zawng Thinlungah Krista chu Lalber a nih theih nan.
