Mizoram Baptist Kohhran Rorelna Sang ber BCM Assembly vawi 117-na chu zainin (March 6 โ 10, 2013) atang hian tan a ni dawn ta a, Rorel Palai turte pawh Assembly neih na hmun tur, Lunglawn-ah an thleng tan ta.ย Kuminah hian Assembly Palai thei tura beisei zat hi mi 1200 vel an ni dawn a, heng bakah hian observers, Co-opted leh delegates dang engngemawzat an awm dawn a ni.
Zanin inkhawm hi Assembly hawnna inkhawm a ni ang a, Rev. Dr. Raltawnga, BCM President-in inkhawm a kaihruai ang a, Assembly a hawng nghal ang. Rev. H. Lianngaia, General Secrteary, BCM-in kum 2012 -2013 chhunga BCM Rawngbawlna report peiin kumin assembly thupui hawnna neiin Thuchah a sawi nghal ang. Kumin Assembly thupui tur chu "I puan in hmun chu zauh rawh' ( Isaia 54:2) tih a ni. Zanin Inkhawmah hian Zaipawl pali - Lungmual Pastor Bial, Serkawn Pastor Bial, Bazar Pastor Bial leh Luangmual Pastor Bial Zaipawl te an zai dawn a ni.
Naktuk, March 7, 2013 zing dar 9:30 atangin Assembly Rorel neih tan a ni ang a. Kumin Agenda langsar zingah - Cambodia rama Missionary tirh thu te, Mission Field thar - Myanmar, Arakan State -a Mission Field thar hawn rawtna te, Kum 5 chhung chu BCM hian Mission lam Project ni lo chu Project lian tham kalpui rih loh rawtna te, BCM Pension Scheme thar siam rawtna te, BCM thawktute Pay revise thu leh Pay Commission din leh rawtna te, BCM-in Nu leh Pa Ni siam thu te, Lunglei South Area-ah BCM enkawl English Medium din rawtna te, Lunglei khawpui chhunga Confenrence Hall/Conference Centre sak thu te bakah Ram pum huapa awmni khama Ram tana Tawngtai rual neih rawtna hrang hrang te a ni. Kum 2013-2014 BCM Budget pharh a ni bawk ang.
Assembly hnuaia Committee hrang hrang - Executive, Central, Mission, Service leh Nomination Committee te thurel fel tawh Assembly-a report leh pawmpui tura thlen chhoh turte bakah Agenda pangngai 10 chuang zet a lut chho a, heng bakah hian ABC atanga thu lut agenda 31 leh Administrative Working Committee atanga thulut thenkhat a tel bawk.
