Mizoram Baptist Kohhran Rorelna Sang ber, BCM Assembly chu nizan atang khan Mizoram Baptist Biak In, Farmveng, Lunglei-ah tan a ni ta a.
Chanchin kan lakkhawm lai hian Assembly Rorel palai inreport zat chu 926 an ni a, Palai engngemawzat la in report lo an awm ni-a hriat a ni. Vawiin, March 5, 2015 (Ningani) zing dar 9:30 khan Rorel Inkhawm tan a ni a. Rorel inkhawm hi Rev. H. Sangchema, President-in kaihruaiin Devotion hun hman zawhah BCM President Elect RevC. Ngurhnema hnenah President nihna hlanin Rorelna dawhkan a hlan a. BCM President thar hian Rorel a kaihruai nghal a ni.
Hun hmasa lamah President Elect thlanna neih a ni a. Rev. Lalthangliana Hnamte chu President Elect atan lungrual taka thlan a ni.
Chanchin buatsaih lai hian thu rel dang hriat theih a la ni lo va, General Secretary report ngaihthlak leh Zawhna leh inhrilhfiahna hun atan hman a ni a. General Secretary report atanga a lan danin Tun dinhmunah Mizoram Baptist Kohhran member 164,486 an ni a. Chhungkua 38,826 awmin, Tualchhung Kohhran 627 a ni. Kum khat kal ta chhungin baptisma chang thar 4,061 an awm a, Nau hlan thar 3,247 awmin Kohhran pawl dang atanga lo lut 3,821 an awm. Pastor bial 77 awmin Pastor thawk lai 133 an awm a. Kohhran Upa 2894 leh Rawngbawltu 3924 an awm a, Pastor pension la dam 35 kan nei a, Pro Pastor 18 an awm bawk.
 |
 |
