Mizoram Baptist kohhran Rorelna sang ber, Assembly Rorelna Farmveng Biak In, Lunglei-a neih chu a ni thumna atan Rorelna neih chhunzawm mek a ni a. Nimin chawhnu leh vawiin chawhma lama an thurel langsar zingah - BCM pum puiin Ram tan chawnghei tawngtai te, Family Planning Programme-a Birth Control kalpui danah Pathian Thu zirtir dan mila inzirtir te, Kohhran tinah taksa, silh leh fen, ei leh bar lama thianghlimna leh zuk leh hmuam laka thianghlimna sermon (temperance service) neih nise tih rawtna te an remtih laiin, Kum 2008 Assembly-in Pastor Nupui Sawrkar hnathawk mekte, Kum 2015 atanga bang tura thu a lo dah tawh tih danglam rawtna erawh chu hnawl a ni.
Nimin chawhnu leh Vawiin chawhma thu passed- Kan ramah Family Planning Programme-a Birth Control kan kalpui dan chungchangah hian Pathian Thuin min zirtir dan mila inzirtir turin BCM pum huaapa hma lak nise
- BCM hian Christian Ethics inzirtirna kawngah hma lain, Value system inzirtirna thlurbing nise
- BCM pum huapin Pathianni zing inkhawm vawi khat Naupangte Ni-ah hman ni rawh se
- Mizoram Missionary hmasa ber Sap Upa leh Pu Buangate thlalak BCM Pastor Quarter zawng zawngah leh Biak Inah emaw Hall-ah emaw a remchang laiah Kohhran tinin tar ni rawh se. Hetiang hian thlalakah ziak lan nise ‘Mizoram Missionary hmasa ber’ (Pioneer Missionary)
- Kum 2015 – 2016 chhungin HATIM pualin BCM Tualchhung Kohhran tinah September thla ralhma-in sum tuak fehchhuah neih ni rawh se.
- Nupaa pawmna Register hi Dan Puitling leh Dante-a inneite Register-ah ziak lovin Register hran BCM Headquarters hian siam rawh se.
- BCM Kohhran tinah kum khata Pathianni (Sunday) tuk khat tal chu taksa, silh leh fen, ei leh bar lama thianghlimna leh zuk leh hmuam laka thianghlimna sermon (temperance service) thlak nise.
- Kohhran humhalh leh tihpun zelna atan BCM Tualchhung Kohhran tinin Seminar buatsaih nise .
- BCM Chhungkaw tinten chhungkaw inkhawm uar zawka kan neih theih nan BCM in hma la se.
- Ram tana Chawnghei tawngtai ram pum huapa neih ni rawh se.
Chanchin kan ziak lai hian Assembly rorel a la kal zel a. ABC atanga thu lut - Constitution Amend rawtna te, Central Committee thu te Service Committee thu te, Mission Committee atanga thu lut bakah Budget 2015-2016 an la hmabak a ni.
