Farm veng Kohhran chuan bialtu pastor hovin Assembly-na hmun tur Biak in leh a hual vela Pandal an zar chu tunkar Pathianni, March 1, 2015 zan hian hlanna neih an tum. Hlanna inkhawm hi Upa K. Lalchhandaman a kaihruai ang a, bialtu pastor Rev.JC. Vanlalluaian thuchah a sawi ang a; bial chhung Kohhran hrang hrang Zaipawlte an zai bawk ang.

Tarlan tawh angin kumin BCM Assembly hi March 4-8 hian Mizoram Baptist Kohhran Biak In, Farmveng, Lunglei-ah nghah a ni dawn a. A dawltu tur Farmveng Kohhran leh Headquarters Office lam pawh an in peih fel thawkhat tawh a ni. Kumin Assembly thupui atan ‘Kohhran Nung’ tih thu hman a  ni ang.

Assembly Turin Farm Veng An Inpeih Ta:

Mizoram Baptist Kohhran rorelna pawimawh ber Assembly vawi 119-na dawl turin Farm veng Kohhran leh khawtlang chu tisa leh thlarauvin an inpeih ta. Farm veng Kohhran hian an dintirh atangin Assembly an dawl vawi khatna a ni a. Kohhranho an phurin an inlungrual em em a. Kohhran mai ni lovin khawtlang pawh an phur a, a tul ang zelin an thawk hova, Assembly palaiten nuam titaka hun an hman theih nan mahni hmun theuhah theihtawp an chhuah a; an in buatsaih dan hi a ngaihnawm a, sawi tur a tam hle. January ni 12 atang khan Biak in zauh hna thawkin hnatlang an tan a. An Biak in chu a hma lam leh a sir tawn tawnah pandal zarin an tizau a; mi 1000 leng turin engkim an peih ta. Assembly dawl tur hian budget nuai 17 an ruahman chu an kutah awmin palaite tan a tul ang zelin an hmang dawn a ni.

 Farm veng Kohhran hi member 1000 chuang hlek an ni a; chhungkua 211 awmin an zinga chhungkaw 120 vel chuan mikhual eng zat pawh thlen huamin an inring vek a, palai tur tan a thlaphan awm loh hle. Assembly dawl tur hian Organising Committee an din a, Department hrang hrang 8-ah insiamin tun dinhmunah Department pawh anmahni hmazawn theuhah an inpeih ta a. Refreshment lam pawhin an menu tichhuak vek tawhin Bawngsa leh Atta per 3 tih te, Arsa sawhchiar (a ruh tel lovin) tih te a ni nawk a. Sa leh mawm ei thei lo tan pawh Sandwich leh Fried Momo tih ang reng vel an ziak tlar dul mai. Refreshment Counter hi 12 ruahman a ni a, Counter tinah mi 80 velin an dawh thei ang a. Mi 1440 in minute 15 chhungin indip buai miah lovin thu chungin ei leh in thei vek tura beisei a ni.

Tisa lama an inbuatsaihna chu eng pawh nise he hun thleng tur leh hmabak hlen chhuak tura thlarau lama inbuatsaihna hi a ngaihnawm a, a thlamuanthlak hle. Hetiangin:

@ Inrinni zan leh zan inkhawm hun dang reng rengah leh thla thar Pathianni hnuhnung ber tlai dar 5-ah Assembly an dawl tur puala tawngtaina an nei thin.

@ Fellowship Department te tawngtai Standing Subject ah nei tura ngen an ni.

@ Kohhran chhungtinte hnenah Assembly puala tawngtaina hun hmang tura ngenin tawngtai Subject tur pawh sem a ni.

@ November 2014 inkar chhung khan Rev H.Lengluta Speaker a hmangin Salvation Camping neih a ni.

@ January thla khan Upa B.Lalthanliana, Gospel Messenger Team Speaker a hmangin Tawngtai Beihpui neih a ni.

Hetiang taka inbuatsaihna nasa leh ropui hmang hian Assembly chu an dawl dawn a ni a; nghahhlelhawm tak a ni.